Qazaqstandyq kásipqoı boksshylar 2016 jyly qandaı belesterdi baǵyndyrdy
13 salmaq dárejesinde óner kórsetetin qazaqstandyq kásipqoı boksshylar sany 62-ge jetti. Sonyń ishinde Golovkın óner kórsetetin orta salmaq dárejesinde 14 boksshymyz bar.
2016 jyly barlyq salmaq dárejelerin qosqanda 29 qazaqstandyq jańa boksshy qosyldy.
Atap aıtar bolsaq, elge esimderi belgili Rýslan Myrsataev asa aýyr salmaqta, al Jánibek Álimhanuly ekinshi orta salmaqta, Astana arlandary sapynda bolǵan Meıirim Nursultanov orta salmaqta óner kórsetti.
Birinshi orta salmaqta Nursultan Jańabaev (2-0,1 KO) osy jyly debıýttik jekpe-jeginde qytaılyq qarsylasyn jeńip, WBA Qytaı chempıony atandy.
Gennadıı Golovkın (36-0, 33 KO) 2016 jyly 2 kezdesý ótkizip, chempıondyq beldikterin qorǵap qaldy. Onyń kelesi qarsylasy orta salmaqtaǵy WBA nusqasy boıynsha álem chempıony Denıel Djeıkobs bolmaq. Golovkın kelesi jyly Saýl Alvares jáne kishi Hýlıo Sezar Chavespen de qolǵap túıistirýi múmkin.
Qanat Islam (22-0, 18 KO) bıyl eki kezdesý ótkizip, Almaty qalasyndaǵy boks keshinde qarsylasyn upaı sany boıynsha jeńdi. Osy jekpe-jekte Qanat WBO Inter-Continental jáne UBC álem chempıony beldigin ıelenip, WBA Fedelatin tıtýlyn saqtap qaldy. Bul jetistik Qanatty óz salmaq dárejesi boıynsha WBA jáne WBO reıtınginiń 5 ornyna jaıǵasýyna múmkindik berdi. Al onyń aldaǵy kezdesýi kelesi jyly AQSh-ta bolady dep kútilýde.
Beıbit Shúmenov (17-2, 11 KO) 2016 jyly bir kezdesý ótkizdi. Jartylaı aýyr salmaqtaǵy tıtýldarynan aıyrylǵannan keıin Beıbit birinshi orta salmaqty baǵyndyra bastady. 2015 jyly birinshi aýyr salmaqtaǵy alǵashqy kezdesýinde WBA ýaqytsha chempıony ataǵyn jeńip alyp, bıylǵy kezdesýinde beldikti sátti qorǵap, WBA turaqty álem chempıony dárejesine kóterildi.
Birinshi aýyr salmaqtaǵy IBO Inter-Continental tıtýlynyń chempıony Isa Aqberbaev 2016 jylǵy ushinshi kezdesýine daıyndyq kezinde jaraqat alyp qaldy. Jeltoqsan aıynyń jıyrma tórtinshi juldyzyna josparlanǵan jekpe-jekte ol horvat Krıstıan Krstachıchpen WBC International Silver tıtýldyq jekpe-jekine daıyndalyp jatqan edi. Aqberbaev sońǵy kezdesýinde GBC(Global Boxing Council cruiserweight title) chempıondyq tıtýlyn ıelengen bolatyn.
WBA ýaqytsha chempıony Janat Jaqııanov (26-1,18 KO) 2016 jyly jaraqatyna baılanysty jekpe-jek ótkizgen joq. Alaıda Jaqııanov aldaǵy 2017 jyldyń 10 aqpanynda birden WBA (Super) jáne IBO tıtýly úshin aıqasatyn bolady.
Astana arlandarynyń burynǵy múshesi Madııar Ashkeev (7-0, 3 KO) jalpy ótkizgen 7 kezdesýiniń 6 jekpe - jegin 2016 jyly ótkizip, barlyǵynda jeńiske jetti.
Jartylaı orta salmaqta Bahtııar Eıýbov (11-0,10 KO) osy jyly 2 kezdesý ótkizip jalpy 11 jekpe-jekte jeńilip kórmegen. Bahtııardyń 12 kezdesýi kelesi jyly 22 qańtar AQSh-ta ótedi dep kútilýde. Qarsylasy ázirshe belgisiz.
Janqosh Turarov (20-0,14 KO) bıyl úsh kezdesý ótkizip, NBA nusqasy boıynsha jartylaı ortasha salmaqta álem chempıony tıtýlyn jeńip aldy.
Birinshi jartylaı orta salmaqtaǵy jerlesimiz Batyrjan Júkembaev (7-0, 6 KO) osy jyly Kanadada qatarynan 7 kezdesý ótkizip barlyǵynda jeńiske jetti. 8-shi jekpe-jegi 28 aqpan kúni ótetini belgili.
Birinshi jeńil salmaqta óner kórsetip júrgen jerlesimiz, WBA NABA tıtýlynyń ıegeri Bekman Soılybaev (9-,4 KO) bıyl bir kezdesý ótkizip WBC EPBC chempıondyq belbeýin jeńip aldy.
2016 jyly jalpy qazaqstandyq boksshylar sátti kezdesýler ótkizip, qazaq boksyn jańa beleske kóterdi. Áýesqoı boksta da jetistikterimiz bar, Rıo-de-Janeıro qalasynda ótken Olımpıada oıyndaryna ulttyq quramamyz tolyq qurammen attanyp, 1 altyn jáne eki kúmis enshiledi.
2017 jyly Qazaqstan kásipqoı boksshylarynyń tyń bıikterden kórinýine tilekshimiz.