Qazaqstandyq kásipkerler úshin sheteldik naryq erekshelikterin kórsetetin karta ázirlenedi

ASTANA. QazAqparat -  Qazaqstandyq kásipkerlerge sheteldik naryqqa shyǵýǵa jón silteıtin karta ázirlenedi. Bul týraly búgin Úkimet otyrysynda  QR Syrtqy  ister mınıstri Qaırat Ábdirahmanov aıtty, dep habarlaıdy QazAqparat tilshisi.

«Investıtsııalar tartýǵa jáne óz ónimderin eksportqa shyǵarýǵa múddeli otandyq kompanııalarǵa tikeleı kómek kórsetýdi jalǵastyrýdamyz. Shaǵyn jáne orta bızneske ekonomıkanyń eń mańyzdy draıveri retinde erekshe kóńil bólinedi. Kásipkerlerimizge eksporttyq naryqtar erekshelikteri týraly baǵdar berýimiz qajet. Bul úshin bizdiń mınıstrlik «Atameken» palatasymen birlesip kedendik, salalyq jáne basqa da rásimderdiń erekshelikterin kórsetetin sheteldik naryqtar boıynsha jol kórsetkish ázirleýdi qarastyrýda», - dedi Qaırat Ábdirahmanov. 

Mınıstr Qazaqstannyń ınvestıtsııalyq ahýaly týraly aıta  kele qolaıly vızalyq saıasatty qalyptastyrý jónindegi belsendi jumysqa nazar aýdartty.

«EYDU, Eýropalyq odaq elderi, sonymen qatar Malaızııa, Monako, BAÁ jáne Sıngapýr úshin vızasyz rejim  engizildi. 20 elmen ózara vızasyz rejim bar. «Tsıfrlyq Qazaqstan» baǵdarlamasy aıasynda halyqaralyq tájirıbeni qarastyrdyq jáne osy jyly birqatar el úshin elektrondy vıza jóninde ilki jobany engizýdi josparlap otyrmyz», - dedi ol.