Qazaqstandyq kásipkerler shubattan ıogýrt daıyndamaq

ASTANA. QazAqparat - Ońtústik Qazaqstan oblysy Arys qalasyndaǵy  «Jańa Aqdala» JShS  agrosalaǵa jańa tehnologııalardy engizýdiń arqasynda jemisti jumys atqarýda. Atalǵan ujym byltyrǵy jyly 2722 tonna qyzanaq jınap, odan 337 tonna tomat pastasyn óndirdi. Budan bólek, ujym qyzmetkerleri  204,8 tonna jemis-jıdek, baý-baqsha ónimderin jınaǵan. Munda óndirilgen ónimder negizinen Almaty, Astana jáne Shymkent qalalaryna jóneltilýde, dep habarlaıdy QazAqparat óńir ákimdigine silteme jasap.

Al Sanaly aýylyndaǵy «Jelmaıa» óndiristik kooperatıvi túıe sútin óndirýmen aınalysýda. Munda kúnine 1 tonnaǵa deıin shubat saýylyp, arnaıy ydystarǵa quıylady. Keıin Astana, Aqtóbe qalalaryna jiberiledi. Bıyl kásiporyn shubattan ıogýrt daıyndaýdy qolǵa alǵaly otyr. 

Arys qalasynyń dıhandary sońǵy jyldary tamshylatyp sýarý ádisimen tabystaryn eseleı túsýde. Byltyrǵy jyly óńir baǵbandary 5500 gektarǵa egilgen baqshadan 134 myń tonnadan astam qaýyn-qarbyz jınaǵan.  Onyń 56 myń tonnasy Germanııa, Baltyq jaǵalaýy elderi men Reseıdiń Máskeý qalasyna jáne Novosibir, Penza, Samara oblystaryna jóneltilgen.

Budan bólek,  63 myń tonna qaýyn men qarbyz Astana men Almaty qalasyna jiberilse, qalǵany oblys naryǵyna saýdaǵa shyǵarylǵan. Sharýalar aldaǵy ýaqytta Syrdarııa jáne Arys ózenderiniń ıgiligin tıimdi paıdalanyp, ózderine tıesili alqaptarda eseli eńbekterin jalǵastyra berýge nıetti.