Qazaqstandyq kásipkerler Elbasyn qoldap úndeý joldady
Kókshetaýdaǵy keramıkalyq árleý kirpishin óndiretin «ENKI» JShS ujymy Nursultan Nazarbaev qazaqstandyqtar úshin qashanda Elbasy bolyp qala beretinin bildirdi.
«Elbasynyń bastamasymen iske asyrylǵan Indýstrıaldy-ınnovatsııalyq damý baǵdarlamasy aıasynda bizdiń kásiporynǵa memleket tarapynan qoldaý kórsetildi. Búgingi tańda biz Ispanııanyń VERDES fırmasynyń qondyrǵylarymen joǵary sapaly ónimderdi shyǵaramyz, sonyń arqasynda óndiriste aıtarlyqtaı jetistikterge qol jetkizip kelemiz», - deıdi kásiporyn qyzmetkerleri.
Kókshetaý sút zaýytynyń ujymy Nursultan Nazarbaev saıasatynyń arqasynda elimizde bıznes júrgizýge barlyq jaǵdaı jasalǵanyn atap kórsetti. Olardyń aıtýynsha, sol salıqaly saıasattyń nátıjesinde, búgingi tańda elimiz qarqynmen damyp keledi, barsha qyzmet salasynda aýqymdy reformalar iske asyrylýda.
«Tynys» AQ ujymy eksportqa baǵyttalǵan, ekonomıkasy myqty, ındýstrıaldy-ınnovatsııalyq damý strategııasyna negizdelgen memleket qurý - táýelsizdik jyldary iske asyrylǵan eń mańyzdy jumys bolǵanyn aıta kele, memlekettiń qoldaýymen kásiporyn damýdyń jańa deńgeıine shyqqanyn jetkizdi. «Otandyq óndirisshilerdi qoldaǵany úshin Tuńǵysh Prezıdent Nursultan Nazarbaevqa sheksiz alǵys», - dedi olar.
«Elordanyń atyn «Nur-Sultan» qalasy dep ózgertý bastamasyna qoldaý bildire otyryp, Elbasyna rahmet aıtamyz», - deıdi «Baıan Sulý» AQ ujymy. Olar Otannyń damýy jolynda Nursultan Nazarbaev sııaqty qajymaı eńbek etýge ýáde etti.
«Agromashholdıng KZ» JShS jáne «Saryarqa Avtoprom» JShS ujymy da Tuńǵysh Prezıdent Nursultan Nazarbaevqa ystyq lebizderin arnady.
«Agromashholdıng KZ» jáne «Saryarqa Avtoprom» tarıhy 1982 jyldan bastalady. Sol kezde Siz Qostanaı úshin asa mańyzdy dızel zaýytyn salý týraly sheshim qabyldaǵan edińiz. Zaýyt 2003 jyly aýyl sharýashylyǵy tehnıkalarynyń, 2010 jyldan avtomobılderdiń tý ustary boldy», - deıdi kásipkerler.
Olar Elbasynyń esimin máńgilik etý úshin elordany «Nur-Sultan» dep ataý bastamasyna qoldaý bildirdi.