Qazaqstandyq kásipkerler AQSh pen Túrkııadan sarapshy shaqyra alady
«2019 jyldyń naýryz aıynan bastap «Bıznes-keńesshi» baǵdarlamasy boıynsha onlaın oqýǵa bolady. Kásip ashýǵa nıetti kez kelgen qatysýshy oqý materıaldaryn vıdeo arqyly qarap, onyń nátıjesinde emtıhan tapsyryp, oqyǵany jóninde sertıfıkat ala alady. Bul baǵdarlama boıynsha 900-den astam kásipkerge búgin de sertıfıkat berildi», - dedi «Atameken» UKP basqarma tóraǵasynyń orynbasary Eldar Jumaǵazıev Úkimettiń baspasóz ortalyǵynda ótken brıfıng barysynda.
Onyń aıtýynsha, palata qazirgi ýaqytta usynylatyn barlyq qyzmet túrin odan ary jaqsartý baǵytynda jumys júrgizip jatyr.
«Іskerlik baılanystar» baǵdarlamasy da bastalǵanyn atap ótkim keledi. Bul baǵyt bıyl barlyq oblys ortalyqtaryn jáne respýblıkalyq mańyzy bar qalalardy qamtıdy. Mysaly, bıyl bul baǵytpen 8 óńir qamtylǵan. «Aǵa senorlar» jobasy boıynsha otandyq kásiporyndarǵa 64 sheteldik sarapshyny shaqyrý kózdelip otyr. Osy jyly kásipkerler túrik jáne amerıkalyq tálimgerlerdi shaqyrta alady. Bul rette kez kelgen kásipker ózine qajetti sarapshydan tálim alýyna bolady», - deıdi ol.
Aıta ketsek, Úkimettiń baspasóz ortalyǵynda ótken búgingi brıfıngte Ulttyq ekonomıka vıtse-mınıstri Ermek Alpysov «Bıznestiń jol kartasy-2020» baǵdarlamasy 2025 jylǵa deıin uzartylatynyn habarlaǵan edi.