Qazaqstandyq kásipker áıelder Túrkııada ótken bıznes forýmǵa qatysty

YSTANBUL. QazAqparat - QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymy Lázzat Ramazanova bastaǵan delegatsııa Ystanbul qalasynda ótip jatqan Túrki saýda-ónerkásip palatasynyń bıznes forýmyna jáne Kásipker áıelder komıtetiniń birinshi otyrysyna qatysty, dep habarlaıdy QazAqparat.

Delegatsııanyń quramy Qazaqstan óńirlerinen barǵan isker hanymdardan quralǵan.

Forýmdy Túrkitildes memleketterdiń yntymaqtastyq keńesiniń VIII sammıti aıasynda Túrki saýda-ónerkásip palatasynyń Bas assambleıasy jáne Túrkııa Úkimeti uıymdastyryp otyr.

Forýmda Lázzat Ramazanova óńirlik deńgeıde, sondaı-aq halyqaralyq deńgeıde de túrki halyqtarynyń múddesin ilgeriletýde Qazaqstan beıbitshilik pen kelisimdilikti qamtamasyz etýdiń halyqaralyq normalaryn ustanatynyn atap ótti.

«Qazaqstan túrkitildes eldermen tyǵyz yntymaqtastyqta. Bul el Prezıdenti Qasym-Jomart Toqaevtyń syrtqy saıasattaǵy ustanymynyń nátıjesi. Qazir barlyq álemde týyndaǵan kúrdeli jaǵdaıda, bizdiń elderimizdiń isker hanymdary ózara qarym-qatynastyń barlyq salalaryn - ekonomıka, bilim berý, densaýlyq saqtaý, kásipkerlik jáne t.b. salalardy nyǵaıtý men damytýdyń jańa joldaryn birlese ázirlep, ortaq usynysty ortaǵa salady dep sanaımyn», - dep atap ótti Lázzat Ramazanova.

Ulttyq komıssııa tóraıymynyń aıtýynsha, tek ótken jyldyń ózinde Qazaqstan men Túrkııa arasyndaǵy saýda aınalymy 3 mlrd dollarǵa jetse, 2021 jylǵy qańtar-tamyz aralyǵynda bul kórsetkish 2,5 mlrd dollar bolǵan. Jobalar ınfraqurylym, densaýlyq saqtaý sektorlaryn, mashına jasaý, taý-ken óndirisi, metallýrgııa, hımııa jáne jeńil ónerkásip salalaryn qamtyǵan. 2005-2021 jyldarda Túrkııadan Qazaqstan ekonomıkasyna tartylǵan tikeleı ınvestıtsııanyń jalpy kólemi 4,8 mlrd dollar boldy. Qazaqstan ekonomıkasyna tartylǵan ınvestıtsııa kóleminiń ósý qarqyny boıynsha Túrkııa AQSh pen Shveıtsarııadan keıin úshinshi oryndy alyp otyr.

Lázzat Ramazanova túrkitildes elder arasyndaǵy bıznes-áriptestikti qalyptastyrýda qazaqstandyq qyz-kelinshekterdiń alar orny erekshe ekenin atap ótti.

«Áıelderdiń ekonomıkalyq múmkindikterin keńeıtý ár eldiń ulttyq ekonomıkasynyń básekege qabilettiligine tikeleı áser etedi jáne qoǵamnyń ál-aýqaty úshin de asa mańyzdy», - dedi Ulttyq komıssııa tóraıymy.

Osyǵan oraı Lázzat Ramazanova túrkitildes elderdiń isker hanymdary arasynda saýda-ekonomıkalyq jáne ınvestıtsııalyq yntymaqtastyqty ári qaraı nyǵaıtýdy, aldaǵy bıznes bastamalardy qoldaýdy jáne olardy júzege asyrýdy barynsha atsalysýdy usyndy. Sondaı-aq eki eldiń isker hanymdary arasynda zamanaýı tehnologııalar salasynda ózara turaqty tájirıbe almasýy jaıynda da usynys bildirdi.

Forým qatysýshylary is shara aıasynda ózara tájirıbe almasyp, áleýmettik-ekonomıkalyq jáne gýmanıtarlyq máselelerdi, sonymen qatar áıelderdiń múmkindikterin keńeıte túsýdiń jolyn, túrkitildes elderdiń yntymaqtastyǵy aıasynda halyqaralyq jáne óńirlik bastamalardy qalyptastyrýda qyz-kelinshekterdiń alar rólin talqylady.