ASTANA. QazAqparat – Malaızııanyń Malakka qalasynda WKF karateden eresekter arasynda XIX Azııa chempıonaty máresine jetti, dep habarlaıdy QazAqparat tilshisi.
Sportty damytý dırektsııasynyń baspasóz qyzmetinen málim etkenindeı, jarystyń sońǵy kúni komandalyq synda júldeli oryndar sarapqa salyndy.
Kýmıte baǵdarlamasynda Qazaqstan erler komandasy kúmis júldege ıe boldy.
Sonymen, chempıonat qorytyndysynda Qazaqstan quramasy 3 altyn, 4 kúmis jáne 4 qola medalmen alǵash ret jalpy esepte top jardy. Japonııa karateshileri (3 altyn, 3 kúmis, 2 qola) ekinshi orynda, al úzdik úshtikti Iran (3 altyn, 2 kúmis, 7 qola) quramasy túıindedi.
Eske sala keteıik, budan buryn olımpıada júldegeri Sofıa Berýltsevanyń Azııa chempıony atanǵanyn jazǵan bolatynbyz.
Sondaı-aq qazaqstandyq karateshiler Azııa chempıonatynda taǵy 6 medal jeńip aldy.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).