Qazaqstandyq qansha balany sheteldikter qamqorlyqqa alǵan
«Jetim balalar men ata-ana qamqorlyǵynsyz qalǵan balalardyń respýblıkalyq derekter bankiniń málimetine sáıkes, 2021 jyly qamqorlyqqa berilgen 24 bala shetelge ketti, al 2022 jyly olardyń sany 13 balany qurady. Balalar ketken sátten bastap qamqorshylar olar boıynsha aqparat bergen joq. Bul memleketti kámeletke tolmaǵan óz azamattaryn qorǵaýdy qamtamasyz etý múmkindiginen aıyrady», - delingen «Ashyq NQA» saıtynda jarııalanǵan «Qazaqstan Respýblıkasynyń keıbir zańnamalyq aktilerine bilim berý jáne bala quqyqtaryn qorǵaý máseleleri boıynsha ózgerister men tolyqtyrýlar engizý týraly» QR zańynyń jobasyna retteý saıasatynyń konsýltatıvtik qujatynda.
Qujatta munyń sebebi zańnamada naqtylyqtyń bolmaýy ekendigi aıtylǵan. Máselen, «Neke (erli-zaıyptylyq) jáne otbasy týraly» kodekstiń 126-babynda qorǵanshy alty aıda bir retten sıretpeı qorǵanshylyq nemese qamqorshylyq jónindegi fýnktsııalardy júzege asyratyn organǵa qamqorlyqqa alynǵan balanyń densaýlyq jaǵdaıy týraly jáne ony tárbıeleý jónindegi, sondaı-aq onyń múlkin basqarý jónindegi jumys týraly esepterdi usynýǵa mindetti dep kózdelgen. Bul rette qorǵanshylyq nemese qamqorshylyq jónindegi fýnktsııalardy júzege asyrý úshin Qazaqstan Respýblıkasynyń Zańynda belgilengen tártippen taǵaıyndalǵan adamdar qorǵanshylar dep tanylady. Alaıda, zańnama atalǵan adamdardyń turǵylyqty eline tıesiligin naqtylamaıdy, sol arqyly olarǵa qorǵanshylyqqa berilgen balalardyń densaýlyq jaǵdaıy, tárbıesi týraly aqparat berý boıynsha Qazaqstan Respýblıkasynyń azamaty bolyp tabylatyn, elden tys jerde turaqty turatyn nemese shetel azamaty bolyp tabylatyn qamqorshy mindetin oryndamaý múmkindigin týǵyzady. Bul naqtylaýdyń joqtyǵy memlekettiń óz balalary týraly habardar bolmaýyna ákep soǵady.
Konsýltatıvtik qujatty QR Oqý-aǵartý mınıstrligi jarııalap otyr. Ol osy jyldyń 22 qazanyna deıin jarııa talqylaýǵa shyǵaryldy.