Qazaqstandyq qamtýdy damytý saıasatyn júıeleı túsý qajet - Indýstrııa jáne jańa tehnologııalar vıtse-mınıstri D. Turǵanov
Búgin Astanada «Keshendi jabdyqtaý men qosalqy bólshekterdi óndirý» taqyrybynda ótip jatqan halyqaralyq forýmda QR Indýstrııa jáne jańa tehnologııalar vıtse-mınıstri Dúısenbaı Turǵanov osyndaı pikir aıtty.
«Qazaqstandyq qamtýdy damytý baǵytyndaǵy memlekettik saıasatty júıeleı túsý qajet. Ol jańa ónimderdi ıgerý jáne óndiriske engizý tetikterin qurý, qolda bar kásiporyndardy qaıta jańartýdan ótkizý, otandyq taýar óndirýshilerdi uzaqmerzimdi tapsyrystarmen qamtamasyz etý baǵytynda júrýi tıis»,-dedi munaı-gaz salasynda qazaqstandyq úlesti ulǵaıtýǵa arnalǵan halyqaralyq forým barysynda D. Turǵanov.
Onyń aıtýynsha, osy maqsatta ortalyq jáne jergilikti memlekettik organdar, sonymen qatar ulttyq kompanııalar men uıymdar otandyq óndiristi keshendi damytýǵa arnalǵan qazaqstandyq qamtýdy arttyrýdyń uzaqmerzimdi, ortamerzimdi jáne qysqamerzimdi salalyq jáne aımaqtyq baǵdarlamalaryn qabyldap úlgergen.
Jer qoınaýyn paıdalanýshylar qazaqstandyq úles kórsetkishteri boıynsha jalpy satyp alýlardyń 70 paıyzyn quraıtyndyǵyn eske sala ketken vıtse-mınıstr, qazaqstandyq qamtýdyń negizgi saıasaty munaı-gaz kompanııalaryna taralýy qajettigin qadap aıtty.
D. Turǵanovtyń atap kórsetkenindeı, búgingi tańda, ókinishke oraı, sheteldik munaı kompanııalaryna álemdik deńgeıde qyzmet usyna alatyn otandyq ınjınırıngtik kompanııalar joqtyń qasy. Saraptamalyq zertteýler, joba aldynda jasalatyn jumystar, tehnıkalyq-ekonomıkalyq dáıektemeler jáne jumys jobalary, tehnıkalyq qyzmetter syndy Qazaqstan aýmaǵynda júrgiziletin barlyq iri jobalar sheteldik kompanııalarmen atqarylady.
Sondyqtan mınıstrlik aldaǵy ýaqytta sheteldik áriptestermen birlesip, salalyq konsaltıngtik kompanııalardy qurýdy josparlaýda.
«Bul munaı-gaz salasynda qazaqstandyq úlestiń artýyna jáne óndiristerdiń damýyn boljaýǵa múmkindik beredi, sondaı-aq tehnologııa transfertin taldaýǵa jáne júzege asyrýǵa, otandyq jobalyq mektepti qurýǵa jaǵdaı týǵyzady»,-dep atap ótti vıtse-mınıstr.
D. Turǵanovtyń aıtyp ketkenindeı, elimizdegi Indýstrııalandyrý baǵdarlamasy aıasynda 13 baǵdarlama qabyldandy. Onyń biri 2010-2014 jyldarǵa arnalǵan Qazaqstandyq úlesti arttyrý baǵdarlamasy. Onyń basty maqsaty otandyq óndiristiń, básekege qabiletti taýarlardyń, jumys pen qyzmetterdiń turaqty damýyna qajetti jaǵdaı jasaý, sonymen qatar olardyń otandyq naryqtaǵy úlesin arttyrý bolyp tabylady.