Qazaqstandyq qamtý boıynsha nátıje ótken jylǵa qaraǵanda joǵary bolýy tıis - Ó. Shókeev

ASTANA. Aqpannyń 9-y. QazAqparat /Rýslan Ǵabbasov/ - Qazaqstandyq qamtý boıynsha nátıje ótken jylǵa qaraǵanda joǵary bolýy tıis. Bul týraly búgin Úkimet otyrysynda Premer-Mınıstrdiń birinshi orynbasary Ómirzaq Shókeev málim etti,

dep habarlaıdy QazAqparat.

«Eger ótken jyly tıisti zańnamalyq bazasyz, negizinen ákimshilik ádispen jumys istesek, al bıylǵy jyly tıisti zań men qaýly bar. Sondaı-aq qazaqstandyq qamtýdy rastaıtyn sertıfıkat bar. Sondyqtan qamtý boıynsha nátıje ótken jylǵa qaraǵanda joǵary bolýy tıis», dep atap ótti Ó. Shókeev.

Eki oblysta 23 mıllıard teńgege memorandýmdarǵa qol qoıylǵanyn jetkizgen ol, «bular kólemdi memorandýmdar. Máselen, onyń bireýi Densaýlyq saqtaý mınıstrligi men «Aqtóberentgen» arasynda bekitildi. Biz otandyq kompıýterlik tomografty shyǵaratyn bolamyz. Osyǵan baılanysty osynda uzaq merzimdi kelisimshartqa qol qoıyldy», dedi.

Aıta keteıik, Úkimet otyrysy barysynda Ekonomıka jáne bıýdjettik josparlaý mınıstri Baqyt Sultanov 2009 jyldyń qorytyndysy boıynsha júıe quraýshy kásiporyndardaǵy jalpy kólemdegi taýarlardy satyp alý, qyzmet kórsetýler turǵysynda qazaqstandyq qamtý úlesi 60 paıyzdy quraǵanyn jetkizdi.