Qazaqstandyq izdeýshiler Reseıde ótken kóktemgi Eske alý vahtasyna atsalysty

SANKT-PETERBOR. Mamyrdyń 5-i. QazAqparat /Elena Mıagkova/ - Qazaqstandyq izdeýshiler Reseıdiń Novgorod oblysynda ótken kóktemgi Eske alý vahtasyna atsalysty. Shara barysynda buryn jerlenbeı qalǵan 477 maıdangerdiń súıekteri tabyldy.

Novgorod oblysynyń 11 aýdanyndaǵy Eske alý vahtasy sáýirdiń 24-inde ashylyp, oblystyq ákimshiliktiń aqparaty boıynsha, oǵan TMD elderinen 1,5 myńnan astam izdeýshiniń basyn biriktirgen 100-ge jýyq jasaq qatysty, olardyń qatarynda qazaqstandyq izdeýshiler de bar.

«Novgorod aýdanyndaǵy Mıasnoı Bor eldi mekeniniń mańynda 247 jaýynger men ofıtserdiń súıekteri tabylsa, Staraıa Rýssa aýdanynda taǵy 230 qyzyl áskerdiń súıekteri tabyldy», - deıdi Eske alý vahtasynyń negizgi uıymdastyrýshylary bolyp tabylatyn novgorodtyq «Dolına» izdeý ekspedıtsııasynyń músheleri.

Іzdeýshiler sondaı-aq, soǵys jyldary keıbir maıdangerler negizgi bıografııalyq málimetterin jazyp, moıyndarynda saqtaǵan birneshe «ajal medalondaryn» tapty.

Staraıa Rýssa aýdanynda tabylǵan maıdangerlerdiń súıekterin jerleý rásimi mamyrdyń 7-sine josparlanyp otyr. Qyzyl áskerlerdiń súıekteri barlyq jaýyngerlik qurmetpen jer qoınaýyna beriledi.