Qazaqstandyq ınjenerlik áskerler alǵash ret halyqaralyq baıqaýǵa qatysýda (FOTO)

ASTANA. QazAqparat - Qazaqstandyq 44 áskerı qyzmetshi «Qaýipsiz baǵdar» jáne «Injenerlik formýla» saıystaryna qatysý úshin Reseıdiń Volgagrad oblysyna keldi, dep jazady QR Qorǵanys mınıstrligi Feısbýktegi resmı paraqshasynda.

«Halyqaralyq Armııa oıyndary aıasynda áskerıler arasynda 23 konkýrs ótse, sonyń biri - «Qaýipsiz baǵdar» jáne «Injenerlik formýla» jarystary. Qazaqstandyq ınjenerlik áskerler bul eki baıqaýǵa alǵash ret qatysqaly tur», delingen jazbada.

Dodada ınjenerlik tehnıka ekıpajdary básekege túsedi. «Qaýipsiz baǵdar» baıqaýy - bul ınjenerlik-saperlik bólimshelerdiń saıysy. Saperler baıqaý sheńberinde ótkeldi, mınalyq alańdy mınasyzdandyrýdy júzege asyrady, áskerlerge arnap jol tóseıdi. Injener-áskerı qyzmetshiler tankige qarsy or arqyly kópir salady. Jarysqa shuńqyrdy kómip tastaıtyn jol tósegish, orman úıindisin tyrmalaıtyn ınjenerlik qorshaý mashınasy tartylatyn bolady. Baıqaý estafetamen aıaqtalady.

Eske sala ketse, saıysqa Reseı, Belarýs, Qazaqstan jáne Qytaı sııaqty tórt memlekettiń komandasy qatysady. Uıymdastyrýshylar bizdiń komandany qonaqjaılyqpen qarsy alyp, 187-shi oqý-jattyǵý ortalyǵynyń kazarmasyna ornalastyrdy.
Konkýrs 2 tamyz kúni resmı túrde bastaý alady. Oıynnyń fınaly 9 jáne 11 tamyz kúnderi ótedi.

foto: facebook.com/modgovkz