Qazaqstandyq ımamdar Túrkııanyń teologııalyq oqý oryndarynda biliktilikterin jetildiredi

ASTANA. QazAqparat - QR Din isteri jáne azamattyq qoǵam vıtse-mınıstri Berik Aryn 6-7 jeltoqsan aralyǵynda Túrik Respýblıkasyna issaparmen baryp, Túrik Respýblıkasy Premer-Mınıstriniń Keńsesi janyndaǵy Din isteri basqarmasynyń basshysy Mehmet Górmez myrza men Qorlar isteri jónindegi bas dırektoratynyń jetekshisi Adnan Ertem myrzamen kezdesti.

Kelissózder barysynda memleket pen dinı birlestikterdiń  ózara árekettestigi, dinı birlestikter men qorlardyń qyzmetin retteý jónindegi máseleleri talqylanyp, dinı ekstremızm jáne búldirgish ıdeıalarynyń taralýyna jol bermeý taqyryby boıynsha pikir almasyldy. Sondaı-aq dinı saladaǵy yntymaqtastyqty jalǵastyrý jaıly, onyń ishinde qazaqstandyq ımamdardyń Túrkııanyń jetekshi teologııalyq oqý oryndarynda biliktilikterin arttyrý jóninde ýaǵdalastyqqa qol jetkizildi, dep habarlaıdy mınıstrliktiń baspasóz qyzmeti.

 Sonymen qatar, QR Din isteri jáne azamattyq qoǵam vıtse-mınıstri B.Aryn eldegi dinı ahýaldy zertteý men boljamdaýmen aınalysatyn «TEPAV» atty Ekonomıkalyq saıasatty zertteý qorynyń jumysymen tanysyp, din salasyndaǵy kúrdeli zertteýler júrgizý men qatar ıslam dininiń hanafı mázhabyn belsendi ilgeriletetin  "ISAM" Islam zertteýleriniń ortalyǵyna baryp qaıtty.

Іssapar barysynda Qazaqstan Respýblıkasy Din isteri jáne azamattyq qoǵam mınıstrliginiń Din máseleleri jónindegi ǵylymı-zertteý jáne taldaý ortalyǵy men Túrik Respýblıkasy Premer-Mınıstriniń Keńsesi janyndaǵy Din isteri basqarmasyna qarasty "ISAM" Islam zertteýleriniń ortalyǵy arasyndaǵy Yntymaqtastyq týraly memorandýmǵa qol qoıyldy.