Qazaqstandyq gazet-jýrnaldardyń Internet nusqaǵa kóshýi 2016 jyly aıaqtalady

ASTANA. QazAqparat - 2016 jyldyń sońyna deıin qazaqstandyq baspa túrindegi BAQ-tyń Internet nusqaǵa kóshýi aıaqtalady. Bul týraly sóz bostandyǵyn zańnamalyq retteý boıynsha ótken konferentsııada QR Investıtsııalar jáne damý mınıstrligi Baılanys, aqparattandyrý jáne aqparat komıteti tóraǵasynyń orynbasary Talǵat Qanaǵatov aıtty.

«Búgingi zamannyń talabyn eskere otyryp, memleket otandyq dástúrli buqaralyq aqparat quraldaryn ǵalamtor keńistigine shyǵarý jumystaryn qolǵa alǵan. Máselen, 2014 jyly «Qazteleradıo» bazasynda arnaıy joba iske qosylyp, joba aıasynda ǵalamdyq júıe boıynsha 20-ǵa tarta otandyq arnalar taratyla bastady. Sonymen qatar, memleket otandyq baspasózdiń de óz ınternet resýrstaryn ashýyna qarjylaı da, tehnıkalyq ta kómek kórsetýde. Osy jyldyń aıaǵyna deıin 400-ge jýyq gazettiń ınternet nusqasy jasalady. Al 2016 jyldyń sońynda barlyq baspa BAQ túrleri ınternet jelisine shyǵarylady», - dedi ol.