Qazaqstandyq ǵalymdardyń zertteý nátıjeleri shet elderdiń de bıznesine enetin bolady

ASTANA. QazAqparat - Shet elderde qazaqstandyq tehnologııalar transferti keńseleri qurylatyn bolady. Bul týraly búgin Senattyń Áleýmettik-mádenı damý jáne ǵylym komıtetiniń keńeıtilgen otyrysynda Bilim jáne ǵylym vıtse-mınıstri Tahır Balyqbaev málim etti. Eske salaıyq, komıtette «Qazaqstan Respýblıkasy men Halyqaralyq qaıta qurý jáne damý banki arasyndaǵy Qaryz týraly kelisimdi (Ónimdi ınnovatsııalardy yntalandyrý jobasy) ratıfıkatsııalaý týraly» zań jobasy talqylanǵan bolatyn.

«Ónimdi ınnovatsııalardy yntalandyrý jobasy aıasynda shetelderde tehnologııalar transfertimen aınalysatyn eki keńse ashýǵa nıettimiz. Bul úshin jumys istep turǵan sheteldik keńseler arasynda arnaıy konkýrstar ótkizetin bolamyz. Ol keńseler qazaqstandyq ǵalymdardyń zertteý nátıjelerin shet elderdiń bıznesine engizýdi qarastyrady. Sosyn atalǵan keńseler arqyly shet elderde qajetti tehnologııalardy da ózimizge tartýdy qarastyramyz», - dedi T. Balyqbaev.

Onyń aıtýynsha, tehnologııalardy kommertsııalandyrý keńseleriniń áleýetin arttyrý sharalary da qarastyrylmaq. Máselen, 2016-2020 jyldar aralyǵynda Údemeli ındýstrııalyq-ınnovatsııalyq damý baǵdarlamasyna qatysatyn joǵary oqý oryndary aıasynda kommertsııalandyrý keńseleriniń áleýetin arttyrý kózdeledi. Bul maqsatqa 10 mln dollar bólinedi. «Sonymen birge, ulttyq ınnovatsııalyq júıeni kúsheıtý jáne ınstıtýtsıonaldyq qurylymdardyń áleýetin arttyrý maqsatynda ınnovatsııalyq taldaýlar ortalyǵy qurylady. Ondaı ortalyqtarda tutastaı respýblıkamyzdaǵy ınnovatsııalyq múmkindikterge, ınnovatsııalyq sharalardyń tıimdiligine monıtorıng júrgizilip, oǵan baǵalaýlar jasalady. Bul jumys Ǵylym qorynyń negizinde júzege asady», - dedi T. Balyqbaev.