Qazaqstandyq ǵalymdar túrli jaralar men kúıikterdi emdeıtin ınnovatsııalyq tańǵysh oılap tapty
Shara barysynda qazaqstandyq ǵalym V.B. Ogaı jýrnalısterge jaralar men kúıikterdi emdeýge arnalǵan X-Graft bıologııalyq jabynyn usyndy.
V.B. Ogaıdyń aıtýynsha: «Sıyrdyń parıetaldy qabyrǵalyq ishastarynan jasalǵan tańý materıaly tereń jáne uzaq emdelmeıtin jaralardy emdeýge arnalǵan, sonymen qatar trofıkalyq jaralardy ýaqytsha tańý shin qoldanylady. Emdik qasıetteri boıynsha bul bıologııalyq jabyn sheteldik analogtardan kem emes, sebebi kollagen men elastınniń tabıǵı talshyqtarynan jasalǵan, ári adam terisine uqsas bıomehanıkalyq qasıetterge ıe. Sondaı-aq, jabyndy stomatologııada qyzyl ıektiń kólemin ulǵaıtýǵa jáne tis ımplantynyń aınalasyndaǵy jumsaq tinderdiń kólemin arttyrý úshin qoldanýǵa bolady».
Dúnıejúzilik densaýlyq saqtaý uıymynyń málimetteri boıynsha jylyna 180 000 adamnyń ólimine túrli kúıikter sebep bolady. Qazirgi ýaqytta álemde Alloderm, He-Derma, Integra jáne Dermagraft sııaqty allogendik jáne ksenogendik bıologııalyq jaralardy tańý arqyly kúıikterdi emdeýdiń zamanaýı ádisteri qoldanylady. Bul jabyndar saýyǵý protsesin tezdetýge, jara ınfektsııasyn aldyn alýǵa, sondaı-aq tańǵyshty aýystyrý kezinde naýqastyń aýyrsyný deńgeıin jeńildete alady. Alaıda, jaralardy tańý materıaly kommertsııalyq turǵydan qoljetimdi bolǵanymen, baǵasy óte qymbat, sondyqtan naýqastardyń múmkindikterin shektep, keńinen qoldaný úshin qıyndyqtar týǵyzady.
Máselen, ólshemi 4×16 sm bolatyn Alloderm jasýshasyz jara jabyny 1800 dollar, al ólshemi 10×10 sm bolatyn Xe-Derma 108 evro turady. Jospar boıynsha ózimizdiń otandyq ólshemi 10×10 sm bolatyn «X-Graft» bıologııalyq jabynyn jasap shyǵaratyn bolsaq, sheteldik nusqalarmen salystyrǵanda edáýir arzanyraq, shamamen 10-12 evro turatyn bolady.
Búgingi tańda bıologııalyq jabyn Qaraǵandy qalasyndaǵy professor H.J. Maqajanov atyndaǵy kóp salaly aýrýhanada jáne Almaty qalasynyń №4 klınıkalyq aýrýhanasynda klınıkalyq zertteýlerden sátti ótip, nátıjesin kórsetti.
Zertteýge jarasynyń kólemi 5-30%, II – III AB dárejeli kúıikteri bar 120 naýqas qatysty. Zertteý nátıjeleri boıynsha qarapaıym dáke tańǵyshtarymen salystyrǵanda bıologııalyq jabyn saýyǵý protsesin edáýir jyldamdatady, jaranyń betine zaqym keltirmeıdi, neovaskýlıarızatsııa men reepıtelızatsııaǵa baılanysty zaqymdalǵan teriniń fýnktsıonaldy qalpyna tez kelýine yqpal etedi. Sonymen qatar, bıologııalyq jabyn dáke tańǵyshymen salystyrǵanda naýqastyń terisiniń dermısin jyldam qalpyna keltirip, bul óz kezeginde naýqastardyń aýrýhanada az ýaqytta emdelýine ákeledi.
Zertteýge qatysqan dárigerlerdiń aıtýynsha, «X-Graft» bıologııalyq jabynyn qoldaný ońaı jáne jaralardy tańýǵa qolaıly, sondyqtan bolashaqta tereń jaralardy emdeý úshin klınıkalyq tájirıbege engizilýi tıis.
«Bizdiń «X-Graft» bıologııalyq jabyny medıtsınalyq qural retinde Qazaqstan men EAEO elderinde memlekettik tirkeýden ótip, klınıkalyq tájirıbege engizilgennen soń, elimizdegi medıtsınalyq qyzmetter deńgeıi kóterilip, naýqastardyń da ómir súrýi jeńildeıdi. Sonymen qatar, aýqymdy jáne tereń kúıikteri bar naýqastardyń óliminiń sany áldeqaıda tómendeıdi dep sanaımyz»- dedi V.B. Ogaı.
Aıta keteıik, atalmysh joba QR BǴM, QR TsDIAÓM, «Ónimdi ınnovatsııalardy yntalandyrý» baǵdarlamasy men Dúnıejúzilik banktiń qoldaýymen júzege asyrylýda. Qural qazirgi kezde klınıkalyq synaqtardan ótip, Qazaqstanda tirkelý satysynda.