Qazaqstandyq ǵalymdar memlekettik qorǵanys tapsyrysymen jumys isteı alady

ASTANA. QazAqparat - Qazaqstandyq ǵalymdar memlekettik qorǵanys tapsyrysmen jumys isteý múmkindigin alady. Bul týraly búgin QR Parlamenti Májilisinde «Qorǵanys ónerkásibi jene memlekettik qorǵanystyq tapsyrys týraly» zań jobasyn tanystyrǵan elimizdiń Qorǵanys jáne aeroǵarysh ónerkásibi mınıstri Beıbit Atamqulov aıtty, dep habarlaıdy QazAqparat.

«Memlekettik qorǵanys tapsyrysyn qalyptastyrý jáne ornalastyrý mehanızmine ózgerister engizý kózdeledi. Atap aıtqanda, Qorǵanys jáne aeroǵarysh ónerkásibi mınıstrligine qorǵanys tapsyrystarynyń bıýdjeti beriledi jáne QAÓM Qorǵanys mınıstrliginiń qajettiligi úshin ónimderdi jetkizýde negizgi tapsyrys berýshi bolyp aıqyndalady. Bul áskerı maqsattaǵy ónimderdi mınıstrlik qalyptastyratyn qorǵanys-ónerkásip saıasatynyń negizgi maqsattaryn eskere otyryp satyp alýǵa múmkindik berip, Qarýly kúshterdi ózine tán emes qyzmetterden bosatady», - dedi ol.

Onyń aıtýynsha, búgingi kúni Tótenshe jaǵdaılar komıtetiniń tapsyrystary qorǵanys tapsyrystarynyń qataryna kirmeıdi. Degenmen barlyq ýaqytta da Tótenshe jaǵdaılar komıtetiniń memlekettik qorǵanys tapsyrysyna muqtajdyq týyndap otyr.

«Keleshekte memlekettik materıaldyq qorǵa arnalǵan ónimderdi satyp alýdy elektrondy formatta Qarjy mınıstrligine berý josparlaǵan. Atalǵan satyp alýlarǵa Eýropalyq ekonomıkalyq odaq elderiniń taýar óndirýshileri de qatysýǵa múmkindik alady. Osyǵan baılanysty qazaqstandyq taýar óndirýshiler básekege qabiletti bolmaı qalýy múmkin. Sondyqtan memlekettik materıaldyq qordy qalyptastyrý barysynda otandyq taýar óndirýshilerdi qorǵaý kerek. Mundaı tájirıbe kórshi elderde bar. Olarda memlekettik materıaldyq qordy qalyptastyrý memlekettik, jartylaı memlekettik qorǵanys tapsyrysy arqyly júrgiziledi»,- dedi Beıbit Atamqulov.