Qazaqstandyq ǵalym shokolad tústi kirpish jasaıtyn tehnologııany oılap tapty

ASTANA. QazAqparat – Eýrazııa ulttyq ýnıversıtetiniń ǵalymy Rýslan Safarov áriptesterimen birge marganets keninen trımarganets tetraoksıdi boıaǵyshyn alýdyń jolyn tapty. Jańa tehnologııany qurylysqa qajetti shokolad tústi kirpishti jasaý úshin qoldanýǵa bolady. Ǵalymdar bul ádisti kommertsııalandyrýdy jáne óndiriske engizýdi josparlap otyr. Bul týraly QazAqparat EUÝ baspasóz qyzmetine silteme jasap habarlaıdy.

Trımarganets tetraoksıdi boıaǵyshyn alýdyń jańa tehnologııasy patentteldi. 2022 jyly joba jetekshisi Rýslan Safarov áriptesterimen birge Ǵylym qorynyń grantyn jeńip aldy. Bul ǵylymı ázirlemeni kommertsııalandyrýǵa jáne óndiriske engizýge múmkindik beredi.

«Qazaqstanda marganets kenderiniń edáýir qory bar. Olardan boıaǵysh alýǵa bolady. Biz ǵylymı zertteý júrgizip, onyń qorytyndysy boıynsha trımarganets tetraoksıdin alýdiń tehnologııasyn taptyq. Onyń úlgisin saraptaý úshin Kókshetaý qalasyndaǵy kirpish zaýytyna tapsyrdyq. Mamandar bizdiń jasaǵan ónimniń sapasy jaqsy ekendigin rastady», - dedi EUÝ oqytýshy-zertteýshisi, hımııa ǵylymdarynyń kandıdaty Rýslan Safarov.

Ǵalym búginde baǵdarlamalaý tilin meńgerip, jańa daǵdylardy ǵylymı jumystarynda keńinen qoldanýda. Bul óz kezeginde zertteýlerdiń aıasyn keńeıtýge jol ashty.

«Geohımııalyq zertteýlerde biz neırondyq jelilerdi qoldana bastadyq. Hımııa, geologııa, IT qıylysyndaǵy ǵylymdardyń mundaı úılesimi jańa qyzyqty nátıjeler beredi, ıaǵnı obektilerdi ádettegi qaraý kezinde aıqyn emes zańdylyqtardy tabýǵa múmkindik jasaıdy. Men ózim baǵdarlamalaýmen, aqparattyq júıelerdi qurýmen aınalysamyn. Sondyqtan geohımııa men qorshaǵan orta obektilerin baqylaý salasynda mashınalyq oqytýdyń neırondyq jeliler jáne basqa tehnologııalary sııaqty kompıýterlik modelderdi qoldaný baǵytyn ıgeremin. Bul zertteý aıasyn keńeıtýge kómektesedi», - deıdi R. Safarov.