Qazaqstandyq ǵalym áıelder latyn grafıkasyna kóshýdi qoldaıdy
«Memleket basshysy qazaq tili álipbıiniń latyn grafıkasyna kóshirilýi týraly Jarlyqqa qol qoıdy. Biz, ǵalym áıelder muny tolyǵymen qoldaımyz. Biz osy protseske óz úlesimizdi qosýymyz, túsindirý jáne ádistemelik jumystardy júrgizýimiz tıis. Biz búgin áriptesterimizben osyny talqylaımyz», - deıdi Qazaqstandyq ǵalym áıelder qoǵamynyń prezıdenti, fılologııa ǵylymdarynyń doktory, professor, Abaı atyndaǵy Qazaq ulttyq pedagogıkalyq ýnıversıtetiniń «Kásibı shetel tili kommýnıkatsııasy» kafedrasynyń meńgerýshisi Tańat Aıapova «Qoǵamdyq sanany jańǵyrtý: latynǵa kóshýdiń tarıhı máni jáne ony engizýge ádistemelik bazany daıyndaý» halyqaralyq forýmynda agenttik tilshisine bergen pikirinde.
Onyń sózine qaraǵanda, forýmdy ótkizýdegi maqsat - qoǵamdyq sanany jańǵyrtý jáne latynǵa kóshý máselelerin talqylaý úshin ǵalym áıelderge kópjaqty dıalog jasaý. Sharaǵa qatysýshylardyń aıtýynsha, qazaq álipbıiniń latyn grafıkasyna kóshýi memlekettiń odan ári damýyna jol ashady, jas urpaqqa qazaq tilimen qatar aǵylshyn tilin de ońaı úırený múmkindigin beredi. Reformanyń arqasynda Qazaqstannyń álemdik qoǵamdastyqtaǵy bedeli artady.
Bul ınvestorlardyń, týrısterdiń elimizge degen qyzyǵýshylyǵyn arttyryp, qazaqstandyq jańa mádenıettiń jahandyq álemge keń qanat jaıýyna jaǵdaı jasaıdy. Olardyń pikirinshe, memlekettik tildiń latyn grafıkasyndaǵy álipbıiniń biryńǵaı standartynyń engizilýi Qazaqstannyń árbir azamatyna qatysy bar ári ol eldi HHІ ǵasyrdaǵy jańa damý kezeńine shyǵarady.
Forýmdy Qazaqstandyq ǵalym áıelder qoǵamy L.N. Gýmılev atyndaǵy Eýrazııa ulttyq ýnıversıtetimen, Abaı atyndaǵy Qazaq ulttyq pedagogıkalyq ýnıversıtetimen, M. Áýezov atyndaǵy Ońtústik Qazaqstan ýnıversıtetimen jáne QR Ulttyq akademııalyq kitaphanasymen yntymaqtastyqta ótkizip otyr. Sharaǵa Qazaqstannyń ǵalym áıelderi, eldiń depýtattyq korpýsynyń ókilderi, belgili memleket qaıratkerleri jáne stýdentter qatysýda.