Qazaqstandyq fýtbol klýby Italııanyń A Serııasynda oınaıtyn komandamen kezdesedi

QYZYLORDA. QazAqparat - Qyzylordanyń «Qaısary» Túrkııada ótetin oqý-jattyǵý jıyny barysynda Italııanyń «Sampdorııa» komandasymen joldastyq kezdesý ótkizýdi josparlap otyr, dep habarlaıdy QazAqparat tilshisi.

Aıta ketsek, búgin qyzylordalyq klýbqa reseılik maman Vıktor Kýmykov bas bapkerlikke taǵaıyndaldy.

«Qazaqstan Premer-lıga komandalary arasynda alǵashqy bolyp «Qaısar» aldaǵy maýsymǵa daıyndyǵyn bastaıdy. Qyzylordalyq fýtbolshylar osy maqsatta Túrkııaǵa barady. Oqý-jattyǵý jıyny barysynda birneshe komandamen joldastyq kezdesý ótkizý josparlanǵan. Solardyń biri 23 jeltoqsanda Italııanyń «Sampdorııa» komandasyna qarsy ótedi», - dedi V.Kýmykov jýrnalısterge bergen suhbatynda.

Bıyl atalǵan klýb óz eliniń birinshiliginde nebári alty upaı jınap, týrnır kestesinde 19-orynda keledi.

Komandaǵa serb mamany Deıan Stankovıch bas bapkerlik etedi.