Qazaqstandyq fılantrop «EKSPO-2017» kórmesine 30 oqýshyǵa bılet syılady

ASTANA. QazAqparat - Fılantrop Oralbek Botbaı Elbasynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyn júzege asyrý usynysyna oraı, óziniń 50 jyldyq mereıtoıy qarsańynda «50 jyldyqqa 50 ıgi is» aktsııasyn bastady.

Elbasy Nursultan Nazarbaev óz maqalasynda: «Basqa aımaqtarǵa kóship ketse de týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp, qoldaý kerek. Bul - qalypty jáne shynaıy patrıottyq sezim, ol árkimde bolýy múmkin. Oǵan tyıym salmaı, kerisinshe, yntalandyrý kerek», dep jazdy. Osyǵan oraı, fılantrop Oralbek Botbaı 2017 jyly elordada ótetin «EKSPO-2017» kórmesine qoldaý kórsetý maqsatynda, Ońtústik Qazaqstan oblysy Báıdibek aýdanynyń úzdik oqıtyn 30 oqýshysyna kórmege bılet syılady. Olardyń jol shyǵyny men jatyn ornyn da fılantrop óz moınyna alyp, Halykaralyq kórme jumysyna úles qosqaly otyr.

Odan bólek, O.Botbaı gýmanıtarlyq jáne tehnıkalyq salada úzdik kórsetkishterge qol jetkizgen qazaqstandyq JOO stýdentterine óz qarajatynan shákirtaqy taǵaıyndady. Sondaı-aq, «Turan» kolledjiniń áleýmettik jaǵdaıy tómen 5 talapkerin de tolyq oqý grantymen qamtamasyz etý kózdelgen.

Atalǵan sharalarǵa qoǵam nazaryn aýdarý maqsatynda 27 sáýir kúni saǵat 11:00-de «Qazmedıa ortalyǵynyń» konferents-zalynda baspasóz máslıhaty ótedi. Oǵan qoǵam jáne memleket qaıratkeri Myrzataı Joldasbekov pen Vetnam Elshisi Doan Hıen jáne ózge de qoǵam belsendileri qatysady.