Qazaqstandyq fılm Pýsan kınofestıvalinde kórsetiledi

ALMATY. QazAqparat- «Aıqaı» fılmi Ońtústik Koreıada 4-13 qazan aralyǵynda ótetin áıgili Pýsan kınofestıvaliniń A Window on Asian Cinema baǵdarlamasynda kórsetiletin boldy, dep habarlaıdy QazAqparat tilshisi.

Fılmniń rejısseri – Kenjebek Shaıqaqov. «Aıqaı» – rejısserdiń ekinshi tolyqmetrajdy jumysy jáne Ulttyq kınony qoldaý memlekettik ortalyǵynyń qoldaýymen túsirilgen alǵashqy fılmi.

«Halyqaralyq kınofestıvalderde bizdiń fılmderimizge degen suranys joǵary ekenin kórip otyrmyz. Azııadaǵy eń iri kınofestıvalderdiń birinde kórsetiletin «Aıqaı» kınokartınasy – osynyń dáleli. Jalpy kınoındýstrııa ókilderi jáne bizdiń ortalyq jumysty bir júıege qoıyp, ár fılm óz maqsatyn aıqyndaýy tıis. Bizge naqty nátıjeler kerek. Bizge fılmderimizdiń sórelerde shań basyp jatqany emes, olardyń prokatqa shyǵýy, festıvalderge qatysyp, jetistikterge jetýi mańyzdy», – dedi UKQMO basqarma tóraǵasy Qurmanbek Jumaǵalı.

«Aıqaı» fılmi kórermenderge eki aıaqsyz týǵan bas keıipkerdiń ómiri arqyly ıadrolyq jarylystan zardap shekken Semeı polıgony qurbandarynyń taǵdyryn jáne anasynan aıyrylǵan balanyń ákesine janashyrlyǵyn, qamqorlyq jasaýǵa degen talpynysyn baıandaıdy.

Kórkem fılmniń túsirilimi Abaı oblysy Aıagóz aýdany Shyńǵoja aýylynda ótti. Basty rólderderde Orynbek Shaımaǵanbetov, Arnur Akram, Erbolat Álqoja, Beınur Baımuhambetov, Erlan Malaev, Aıbek Imanqulov jáne Aıǵanym Nursultan oınaıdy.

Aıta keteıik, Busan International Film Festival 1996 jyldan bastap jyl saıyn Ońtústik Koreıanyń Pýsan qalasynda ótetin Azııadaǵy eń iri kınofestıvalderdiń biri.