Qazaqstandyq fılm Máskeý kınofestıvestıvalinde top jardy

NUR-SULTAN. QazAqparat - Rejısser Farhat Sháripovtyń «Tulǵalyq ósý trenıngi» kórkem fılmi 41-shi Halyqaralyq Máskeý kınofestıvestıvalinde Gran-prı jeńip aldy. Bul týraly QR Mádenıet jáne sport mınıstri Arystanbek Muhamedıuly Feısbýktegi paraqshasynda jazdy, dep habarlaıdy QazAqparat tilshisi.

«Bul - elimizdiń bedeli joǵary MHKF konkýrsynyń tarıhynda alǵan tuńǵysh marapaty! Kartına QR Mádenıet jáne sport mınıstrligi tapsyrysymen «Qazaqfılm» stýdııasynda túsirilgen. Fılm stsenarıi Danııar Súgiralınovtyń «Kırpıchı 2.0» shyǵarmasynyń negizinde jazylǵan. «Úzdik fılm» nomınatsııasyndaǵy «Altyn Áýlıe Georgııdi» Sháripovke qazylar alqasynyń tóraǵasy, ataqty rejısser Kım Kı Dýk tapsyrdy», - dep jazdy mınıstr.

Arystanbek Muhamedıuly óz jazbasynda Farhat Sháripovty quttyqtady.

Áleýmettik drama qyryq jasqa kelgen, orta jas kúızelisin bastan keship júrgen bank qyzmetkeri Qanattyń ómirbaıanyn baıandaıdy. Onyń esh armany da, ómirden kúteri de joq. Alaıda bir kúni Qanat tulǵalyq qalyptasý, kóshbasshylyq qasıetterdi damytý trenıngine tap bolady.

«Fılmniń jaryqqa shyǵýyna yqpal etken barsha adamǵa alǵys aıtamyn. Aldymen otbasyma myń alǵys. Sol sebepti bul jeńisimdi ákeme arnaımyn. Al festıval uıymdastyrýshylary men kórermenderine kóp rahmet», - dedi MHKF laýreaty Farhat Sháripov aǵynan jarylyp.

Eske sala ketsek, atalmysh fılmniń tusaýkeseri osy jyldyń qańtar aıynda ótken edi. Otandyq prokatqa shyǵyp qoıǵan kınotýyndy Almatyda túsirilgen. Basty rólde Dýlyǵa Aqmolda men Erjan Túsipov oınaıdy, sondaı-aq fılmge Gúljamal Qazaqbaeva, Ásel Qalıeva, Fılıpp Voloshın jáne basqa da akterler túsken.