Qazaqstandyq fermerler Eýropaǵa eksportty ulǵaıtýǵa daıyn – Prezıdent
«Ortaq múddege súıene otyryp, óz pikirimshe, Qazaqstan úshin ǵana emes, óńirdiń búkil elderi úshin de strategııalyq mańyzy bar basym baǵyttardy usynǵym keledi. Sońǵy jyldary Ortalyq Azııa elderiniń ishki óńirlik ekonomıkalyq baılanystary jańa sapaly deńgeıge ósti. Ótken jyldyń ózinde Qazaqstannyń óńir elderimen taýar aınalymy 19% artyp, 8 mıllıard dollardy qurady. Jaqyn arada bul kórsetkishti 15 mıllıardqa jetkizýdi kózdep otyrmyz», - dedi Memleket basshysy «Ortalyq Azııa – Eýropalyq Odaq» basshylarynyń ekinshi kezdesýinde.
Qasym-Jomart Toqaev Eýropalyq Odaq elderimen jalpy óńirlik saýda kólemi de qarqyndy artyp jatqanyn aıtty.
Ótken jyldyń qorytyndysy boıynsha bul kórsetkish 60%-dan asa artyp, 49 mıllıard dollarǵa jetken.
«Saýda nomenklatýrasyn keńeıtý jolymen eksportty ulǵaıtý – basym mindet bolyp otyr. Qazaqstan EO elderine mashına jasaý, temir jáne bolat óndirisi, tamaq ónerkásibi sııaqty salalarda 2,3 mıllıard dollarǵa 175 shıkizattyq emes taýar pozıtsııasy boıynsha óz eksportyn ulǵaıtýǵa daıyn», - dedi Prezıdent.
Sonymen birge, Memleket basshysy aýyl sharýashylyǵynda da yntymaqtastyqtyń aýqymdy keleshegi bar ekenin jetkizdi.
Bizdiń elimiz jyl saıyn 5 mıllıon tonna dándi daqyl men 1,5 mıllıon tonna un eksporttaıdy.
«Ótken jyly Qazaqstan men EO elderi arasynda azyq-túlik taýarlary boıynsha ózara saýda kólemi 35%-ǵa artyp, 1 mıllıard dollarǵa jýyqtady. Munymen shektelip qalmaımyz. Qazir bizdiń fermerler dándi jáne maıly daqyldardyń, basqa da ónimderdiń eksportyn arttyrýǵa daıyn. Agrarlyq saladaǵy ózara áleýetti paıdalanyp, óńirlerimizdiń azyq-túlik qaýipsizdigin aıtarlyqtaı nyǵaıta alamyz», - dedi Prezıdent.
Aıta keteıik, Prezıdent Qasym-Jomart Toqaev Ortalyq Azııa memleketteri men Eýropalyq Odaq basshylarynyń ekinshi kezdesýine qatysý úshin Sholpan-Ata (Qyrǵyzstan) qalasyna jumys saparymen bardy.