Qazaqstandyq eksporttaýshylar byltyr josparlaǵan kólemnen 7 mln tonna az munaı jóneltti
«Kaspıı Qubyr jelisi Konsortsıýmy Batys Qazaqstannan munaıdy Qara teńizdegi teńiz termınaly arqyly álemdik naryqtarǵa jetkizetin negizgi eksporttyq qubyr. Ol Qazaqstannan munaı eksportyn uıymdastyrý júıesinde mańyzdy strategııalyq pozıtsııaǵa ıe. Kaspıı qubyr konsortsıýmy Qazaqstan Respýblıkasynyń Tuńǵysh Prezıdentiniń bastamasymen Batys Qazaqstan ken oryndary men Kaspıı teńizinde ornalasqan birqatar reseılik kenishterden munaı tasymaldaý úshin qurylǵan», - dedi Nıkolaı Gorban Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, qubyrdyń uzyndyǵy 1,5 myń shaqyrymdy quraıdy. 15 munaı aıdaý stansasynan, sondaı-aq Qara teńiz jaǵalaýyndaǵy qashyqtyqtan aılaq quraldary bar teńiz termınalynan turady.
«Joba Qazaqstan men Reseıdegi joǵary memlekettik deńgeıde qaltqysyz qoldaýǵa ıe boldy. Al 1996 jyly aktsıonerler kelisimge qol qoıdy. Qazaqstanda Teńiz, Qarashyǵanaq jáne taǵy basqa ken oryndaryn óńdeıtin, sondaı-aq jumys isteıtin iri munaı óndirýshi kompanııalardyń barlyǵy derlik aktsıonerler qataryna kiredi. 2020 jyldyń sońynda konsortsıýmnyń teńiz termınalynda 59 mıllıon tonnadan astam munaı qabyldanyp, jóneltildi. Onyń 51,7 mıllıon tonnasy qazaqstandyq júk jóneltýshilerdiń úlesinde. Ókinishke qaraı, bul jospardan shamamen 7 mıllıonǵa tonnaǵa az. ıAǵnı biz jospardyń 89,8%-yn ǵana oryndadyq, 572 tanker jónelttik», - dedi spıker.