Qazaqstandyq ekolog: Sibir ózenderin Aral teńizine burý óńirdiń ekojúıesin ózgertedi
«Sibir ózenderin burý sekildi kóptegen daýly jobalar bar. Men ekolog retinde tabıǵı ekojúıeni antropogendik faktorlar arqyly ózgertý belgili bir saldarǵa ákep soqtyratynyn eskertemin. Budan tys, ol ózenderdiń aınalasynda ekojúıeniń ózin-ózi retteý protsesi júredi, al bul ekologııaǵa óńirlik, tipti jahandyq aýqymda yqpal etýi múmkin. Sonymen qatar, munyń tıimdi jáne zalaldy tustary qanshalyq ekenin baǵalaý qıyn. Óıtkeni qazir biz Shyǵys jáne Ortalyq Qazaqstanda óte aýqymdy sý tasqyndaryn kórip otyrmyz. Tasyǵan sý Qazaqstannyń tipti ondaǵan jyl boıy keýip jatqan jazyq dalalaryna da jaıyldy», - deıdi Qaısha Atahanova.
Onyń sózine qaraǵanda, qazirgi kezde Aral problemasyn sheshý úshin meılinshe ońtaıly joldaryn tabýdyń qazirgi zamanǵy ári ınnovatsııalyq baǵyttary da bar.
«Qazir kórip otyrmyz, jergilikti turǵyndar týǵan ólkesin tastap ketý bylaı tursyn, úı salyp jatyr, tamshylap sýarý júıesin qoldanyp jatyr, qurǵaqshylyqqa tózimdi ósimdikter egip, aýyl sharýashylyǵyn júrgizýge kúsh salyp jatyr. Munda tabıǵı ómir men sý qaldyqtaryna nazar aýdarý qajet. Olarǵa múmkindik berip, sol «ómir araldarynyń» bolashaqta «ómir jelisimen» baılanysýyna jaǵdaı jasaý qajet. Túbegeıli qalpyna kelýi úshin 300 jyl ýaqyt jumsalýy da múmkin, biraq bastysy, ol aqyryndap jandana túsedi», - dedi ol.
Eske sala keteıik, 7-8 maýsym kúnderi Tashkentte «Aral apatynyń saldaryn azaıtý jónindegi birlesken áreketter: jańasha kózqarastar, ınnovatsııalyq sheshimder, ınvestıtsııalar» taqyrybynda halyqaralyq konferentsııa ótti. Budan tys, osy konferentsııa aıasynda shara qatysýshylary Aral mańy aımaǵyna: Nókis, Moınaq qalalaryna baryp konferentsııa ótkizdi, sondaı-aq «Kemeler molasyna» bardy.