Qazaqstandyq eki fılm Gatchın kınofestıvalinde júlde aldy
Kınostýdııa baspasóz qyzmetiniń málimetinshe, qoıýshy-sýretshi Ermek Ótegenov, Bolat Qalymbetovtyń «Muqaǵalı» fılmindegi úzdik jumysy úshin Halyqaralyq qazylar alqasynyń arnaıy dıplomymen marapattaldy.
Úzdik stsenarıı úshin júldeni rejısser Darejan Ómirbaevtyń «Aqyn» fılmi aldy.
Bıyl Gatchındegi kınofestıvaldiń konkýrstyq baǵdarlamasyna kásibı avtorlar men debıýtanttardyń 35 fılmi engen. Baıqaýǵa Reseı, Belarýs, Qyrǵyzstan, Armenııa, Izraıl, Qazaqstan jáne Tájikstan elderiniń iri tanymal stýdııalary men táýelsiz avtorlary óz kartınalaryn usyndy.
Byltyr belgili rejısser Bolat Qalymbetov túsirgen «Muqaǵalı» fılmi «Temnye nochı» atty 25-shi Tallın kınofestıvlinde (PÖFF) ekýmenıkalyq qazylar alqasynyń arnaıy júldesine ıe bolǵan edi.
Aıta ketsek, qazaqtyń aqıyq aqyny Muqaǵalı Maqataevtyń 90 jyldyǵyna oraı QR Mádenıet jáne sport mınıstrliginiń tapsyrysy boıynsha Sháken Aımanov atyndaǵy «Qazaqfılm» AQ jaryqqa shyǵarǵan kınotýyndy aty ańyzǵa aınalǵan aqyn ómiriniń sońǵy jyldary týraly baıandaıdy. Fılmniń stsenarııin belgili jazýshy Júsipbek Qorǵasbek rejısser Bolat Qalymbetov jáne Ǵazız Nasyrovpen birge jazdy. Atalǵan kınotýyndy byltyr 21 qazanda prokatqa shyqqan bolatyn.
Al, rejısser Dárejan Ómirbaevtyń «Aqyn» fılminiń álemdik deńgeıdegi tusaýkeseri 34-shi Halyqaralyq Tokıo kınofestıvali sheńberinde ótti.
Aıta keteıik, «Aqyn» fılmi tehnologııalar damyǵan qazirgi zamanda ónerdiń qoǵamda alatyn orny týraly oı qozǵap, poezııaǵa suranys azaıǵan dáýirde aqynnyń kúıinishi týraly syr shertedi.
Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi.
Fılmniń stsenarııi nemis jazýshysy German Gesseniń «Avtorlyq kesh» atty avtobıografııalyq áńgimesi jelisimen jazylǵan.
Fılmdegi basty róldi «Jigitter» tobynyń ánshisi Erdos Qanaev somdaıdy.