Qazaqstandyq eki boksshy qyz Azııa chempıonatynyń fınalyna shyqty

ASTANA. QazAqparat - Taıland astanasy Bangkok qalasynda ótip jatqan 22 jasqa deıingi jastar arasynda bokstan Azııa chempıonatynyń fınalyna Qazaqstan qyzdar quramasynan eki boksshy shyqty, dep habarlaıdy QazAqparat tilshisi.

Olar - 70 kelide Jasmın Kızatova jáne 81 kelide Gúlsaıa Erjan.

Jasmınniń qarsylasy — ózbekstandyq Azıza Zorıkova bolsa, Gúlsaıanyki - taılandyq Pornıpa Chýtı.

Fınal 25 qańtar kúni Astana ýaqytymen 13:00-de bastalady.

Eske sala keteıik, qurlyqtyq dodanyń fınalyna elimizdiń erler quramasynan alty boksshy shyqty.

Olardyń qatarynda Sanjar Tashkenbaı (48 keli), Nursultan Altynbek (54 keli), Mahmýd Sabyrhan (57 keli), Abzal Serik (67 keli), Sabyrjan Aqqalykov (71 keli) jáne Dıas Moljigitov (75 keli) bar.

Fınalda qazaqstandyq tórt boksshy ózbekstandyq bylǵary qolǵap sheberlerimen qolǵap túıistiredi.

⠀

Foto: prosports.kz