Qazaqstandyq dızaınerdiń kıimderin Gollıvýd aktrısalary kıip júr
Dına Qabdolla 15 jasynda Almatydan Anglııaǵa kóship barǵan. Kembrıdjdegi kolledjdi Art Sciences mamandyǵymen bitirgen boıjetken keıinnen AQSh-tyń Los-Andjeles qalasyna qonys aýdarǵan.
Ónerpaz qyz óziniń tól AyaByDK brendin 2014 jyly ashty. Bir jyldan soń ınternet-dúken iske qosyldy. Qazir Dınanyń kıimderi Los-Andjelestegi 6 dúkende satylyp jatyr.
Qazaqstandyq dızaıner jaqynda jańa asýlardy baǵyndyrmaq. Atap aıtqanda, jaqynda dızaıner Los Angeles fashion week aptalyǵyna qatysýǵa shaqyrtý aldy.
«Olar bizdiń pochtamyzǵa hat jibergen. Túsingenim, olar meniń shyǵarmashylyǵymdy únemi baqylap otyr eken. Endi aldaǵy jyldyń 1-6 naýryzynda Los-Andjelestegi sán aptalyǵyna arnaıy toptama daıyndap jatyrmyz. Bizdiń kıimderimiz qaı kúni podıýmǵa shyǵatynyn áli aıta almaımyn», - dedi Dına Qabdolla Almatydaǵy AYA jáne AL'AYA by Dina Kabdolla toptamasynyń jabyq tanystyrylymynda.
Onyń aıtýynsha, Gollıvýd fılmderinde qoldanylatyn toptamanyń barlyǵy Qazaqstanda tigiledi.
«Dızaındy men óz komandammen jasap jatyrmyn. Eskızder de osynda jasalyp, Amerıkaǵa jiberiledi. Meniń maqsatym - qazaqstandyq ónimderdi eksportqa shyǵarý. Sapasy jaǵynan bizdiki olardykinen kem túspeıdi»,- deıdi Dına Qabdolla.
Dızaınerdiń kıimderin aktrısa Margo Robbı «Jyrtqysh qustar» kınokomıksinde kıetin boldy.
«Biz Los-Andjelestegi shoý-rýmda jumys jasap jatqanda jańa fılmniń kostıýmerleri kelip, kóp brendtiń ishinen bizdiń brendti tańdady. Olar 2-3 kıimge tapsyrys berdi»,- dedi ol.
Aıta ketý kerek, Dına Qabdollanyń kıimderin amerıkandyq aktrısa Perıs Hılton kıip júr. Dınanyń bir kóılegin Perıs Berlındegi jýrnalǵa fotosessııa úshin alǵan. Ánshiler Bebe Rexha, Kamıla Kabelo gastroldik saparlaryna Dınanyń kıimderin kıedi. Al, Fifth Harmony tobynyń ánshi qyzdary óz beıneklıpterine kostıýmderdi Dınaǵa tikkizedi.