Qazaqstandyq dıplomattar Nıý-Iorkte Halyqaralyq as festıvalin uıymdastyrdy

ASTANA. QazAqparat - Qazaqstan bastamasymen 35 memlekettiń konsýldyǵy Nıý-Iorkte International Food Festival Halyqaralyq as festıvalin ótkizdi, dep habarlaıdy QazAqparat.

Festıval ekinshi márte uıymdastyrylyp otyr jáne byltyrǵy jyldaǵydaı bul shara úlken qyzyǵýshylyqqa ıe boldy. Qonaqtarǵa ulttyq ashana taǵamdarynan dám tatýǵa múmkindigi týdy.

Kelýshilerge ár eldiń ekzotıkalyq astary: Kolýmbııanyń empanadasy, arepasy, pandebonosy, Perýdiń selıche men kaýsıtasy, Gondýrastyń baleadas pen pastılıtosy, Túrkııanyń sıgara beýrek pen pahlavasy, sonymen qatar Aljırdiń leber men deglaty jáne ózge de taǵamdar usynyldy.

 

Ortalyq Azııa memleketterinen tanymal qazaq taǵamdary qoıyldy. Qazy-qarta, jal-jaıa, baýyrsaqtar men samsa úlken qyzyǵýshylyq týdyrdy.

Ashylý barysynda taǵamdardan basqa álemniń túrli halyqtarynyń mádenıeti, óneri, turmys salty t.b. dástúrlerimen tanysý múmkindigi boldy.

Sharanyń resmı bóliginde sóz alǵan Nıý-Iorktegi QR bas konsýly Raýshan Esbolatova, Qazaqstan atalmysh bastamany tek qazaq salty men mádenıetin tanytý, memleket bedelin arttyrý úshin ǵana emes, barsha halyq ókilderiniń jaqyndyǵyn kúsheıtý maqsatynda kótergenin atap ótti.

 

Óz kezeginde Brýklın okrýgi basshysynyń orynbasary Dıana Reına, bul festıval konsýldar men dıplomattarǵa túrli deńgeıde baılanys ornatýǵa jáne tanysýǵa múmkindik berip otyrǵandyǵyn tilge tıek etti.

 

As festıvaline kelgen qonaqtarǵa EKSPO-2017 jáne Qazaqstan týraly aqparat beretin kitapshalar taratyldy, dep habarlaıdy QR SІM baspasóz qyzmeti.