Qazaqstandyq dıplomattar Bakýdegi Jaýyngerlik dańq memorıalyna gúl shoqtaryn qoıdy

ASTANA. QazAqparat - Qazaqstannyń Ázerbaıjandaǵy dıplomatııalyq korpýsy, QR Qorǵanys mınıstrligi Áskerı attashesiniń apparaty Bakýdyń Narımanov aýdanyndaǵy Jaýyngerlik dańq memorıalyna Jeńis kúnie oraı jyl saıyn ótetin merekelik sharaǵa qatysty, dep habarlaıdy QazAqparat tilshisi.

Merekelik sharaǵa Ázerbaıjan Parlamentiniń depýtattary, Qorǵanys mınıstrliginiń ókilderi, ÁR-daǵy TMD elderiniń dıplomatııalyq mıssııalarynyń basshylary men qyzmetkerleri, áskerı attasheleri qatysty. TMD-ǵa qatysýshy elder Belarýs, Qazaqstan, Qyrǵyzstan, Tájikstan, Túrikmenstan jáne Ózbekstan atynan sóz sóılegen Qazaqstan Elshisi Beıbit Isabaev sharaǵa qatysýshylardy Jeńis kúnimen quttyqtap, maıdanda jáne tylda fashızmmen kúreste batyrlyq pen erlik kórsetken ardagerlerge rızashylyǵyn bildirdi.

«Bul kúni biz maıdanda jáne tylda fashızmmen kúreste batyrlyqpen erlik kórsetip, ortaq jeńisti alyp bergen jaýyngerlerdiń esimderin eske alyp, ardagerlerimizge úlken alǵysymyzdy bildiremiz. Ekinshi dúnıejúzilik soǵys adamzat tarıhyndaǵy eń qasiretti paraqtardyń birine aınaldy. Júzden astam ultpen ulys soǵysqa qatysty. Sondyqtan da sol soǵys jáne ol jaıyndaǵy estelikter - bizdiń elderimizdiń ortaq tarıhynyń bólshegi. Biz aǵa býynnyń erligin esh ýaqytta umytpaımyz», - dedi Beıbit Isabaev.

Sonymen qatar Qazaqstan Elshisi beıbitshilik jolynda mıllıondaǵan adamnyń ómirin jalmaǵan sol bir zulmat soǵystyń jeńimpazdarynyń urpaqtary ekendigimizdi maqtan tutatynymyzdy basa aıtyp ótti.