Qazaqstandyq dıplomattar «Aýylyma kitap» aktsııasyna qatysty

NUR-SULTAN. QazAqparat – Qazaqstan Respýblıkasy Syrtqy ister mınıstrliginiń ujymy men «Qazaqstandyq dıplomattar birlestigi» Otbasy kúnine arnalǵan «Aýylyma kitap» jalpyulttyq qaıyrymdylyq aktsııasyna qatysty.

Aktsııanyń maqsaty – oqýshylar arasynda kitap oqý mádenıetin ilgeriletý, óskeleń urpaqtyń joǵary azamattyq jáne rýhanı-ónegelik baǵdaryn qalyptastyrý. Mektepter men kitaphanalardyń bilim álemine baǵyttaýshy erekshe rólin atap ótken syrtqy saıası mekemeniń qyzmetkerleri Aqmola oblysy Qoıandy aýylyndaǵy №2 orta mekteptiń kitaphana qoryna qazaq, orys jáne aǵylshyn tilderinde 200-den astam kórkem ádebıet kitaptaryn syıǵa tartty.
Mektep oqýshylary men ustazdarymen kezdesýde Syrtqy ister mınıstrligi Halyqaralyq aqparat komıtetiniń tóraǵasy Asqar Abdrahmanov jas urpaqtyń dúnıetanymyn qalyptastyrýda jáne keleshekte kez-kelgen mamandyqtyń, sonyń ishinde halyqaralyq qatynastardyń qyr-syryn úırenýde, odan ári bilim alýǵa daıyndalýda kitaptyń mańyzy zor ekenin atap ótip, balalarǵa jańa bilimdi igerýde tabystar tilep, kitapty kóbirek oqýlaryna tilektestik bildirdi.

Óz kezeginde mektep dırektory Qarataev Turar Batyrǵalıuly men Aqmola oblysy Tselınograd aýdany bilim qyzmetkeleriniń kásipodaq kenesiniń tóraǵasy Qaıyr Sátbaldın mektepke kóńil bólip, óskeleń urpaqtyń biliminiń artýy men rýhanı ósýine jaǵdaı jasaýǵa qosqan úlesteri úshin rızashylyqtaryn bildirdi.

Sondaı-aq, mektep oqýshylary qundy syılyqtar úshin «Qazaqstan dıplomattar birlestigine» alǵys aıtyp, qonaqtardyń nazarlaryna kishigirim kontserttik baǵdarlama usyndy.