Qazaqstandyq Dımash Qudaıbergen «Slavıan bazary-2015» baıqaýynda top bastap tur

ASTANA. QazAqparat - Baıqaýdyń eki kúninde 175 upaı jıǵan qazaqstandyq ánshi Dımash Qudaıbergen «Vıtebsk-2015» XXIV estrada ánderin oryndaýdyń halyqaralyq baıqaýynyń bas júldesin alýǵa úmitti.

Bul týraly Narodnyıa naviny Vitsebska habarlady.

Eske sala keteıik, baıqaýdyń alǵashqy kúni Dımash 89 upaı jınaǵan, 12 shildede ol 86 upaıǵa ıe boldy.

Ekinshi kontsertte qazaq ánshisimen birdeı upaı belorýstik Valerııa Grıbýsovaǵa buıyrdy. Boıjetken alǵashqy kúni 85 upaıǵa ıe bolǵandyqtan, jalpy esepte onyń enshisinde 171 upaı bar.

Atap ótý kerek, «Vıtebsktegi slavıan bazarynyń» 24 jyldyq tarıhynda qazaqstandyq ánshiler bas júlde túgili birinshi syılyqqa da ıe bola almaǵan.

Baıqaý jeńimpazy men júldegerlerine dıplomdar men syılyqtardy usyný marapaty búgin,13 shildede «Slavıan bazarynyń» jabylý saltanatynda ótedi. Sharaǵa Belarýs prezıdenti Aleksandr Lýkashenko qatysýy kútilýde. Vıtebskide memleket basshysynyń kelýine arnalǵan daıyndyqtar bastalyp ketti.