Qazaqstandyq desantshylar Elbrýs shyńdarynda ótetin áskerı saıysqa daıyndalýda (FOTO)
QR QM baspasóz qyzmetiniń habarlaýynsha, desantty túsirý, taýly jerde barlaý, jaýyngerler men qarý-jaraqty bir jerden ekinshi jerge kóshirý - bul desant bıatlonyna qatysatyndardyń basty is-qımyldary. Daıyndyq kezinde áskerıler Tekelide túrli jerlermen júrdi, áýe desanttaýdy, qarýdy ustaý jáne qarsylastyń tylynda urys júrgizýdi qaıtalady.
Odan basqa, taýly jerde barlaýda jaýyngerlerdiń daıyndyǵy tekserildi. Munda áskerıler tabıǵı bógetterden ótýi tıis edi.
«Biz tik jartasqa órmeledik. Bul qajetti jattyǵý. Ol úshin qaısarlyq jáne bıiktikten qoryqpaý kerek. Osy jattyǵýdy oryndaý kezinde komandalyq jumysymyz tekseriledi», - dedi 48386 áskerı bóliminiń áskerı qyzmetshisi kishi serjant Ramazan Erǵalı.
«Armııa halyqaralyq oıyndary - 2016» saıysyna daıyndalýmen qatar áskerı qyzmetshiler «Elbrýs shyǵyrshyǵy - 2016» halyqaralyq dodasyna qatysý úshin de jaýyngerlik daıarlyq deńgeıin shyńdaıdy.
Atalmysh jarys Reseı Federatsııasynda ótedi. Teńiz deńgeıindegi 5 642 metr bıiktikte Elbrýs shyńyn baǵyndyrýda ózge elderdiń áskerı alpınısterimen kúsh synasýda áskerı qyzmetshiler quzǵa órmeleý, taýly ózender arqyly ótkelden ótý, arqan arqyly ótý jáne taýly jerde jaralyny alyp júrý sekildi elementterdi pysyqtaıdy.