Qazaqstandyq depýtattar EQYU PA sessııasyna qatysty
Qazaqstan delegatsııasynyń quramyna senatorlar Ikram Adyrbekov pen Serik Nógerbekov, sondaı-aq Májilis depýtaty Svetlana Bychkova men Jambyl Ahmetbekov engen bolatyn.
EQYU Parlamenttik forýmynda parlamentshiler Assambleıanyń Jalpy úsh komıtetiniń (saıası máseleler jáne qaýipsizdik; ekonomıkalyq máseleler, ǵylym, tehnologııa jáne qorshaǵan orta; demokratııa, adam quqyqtary jáne gýmanıtarlyq máseleler) jumysyna, komıtetterdiń birlesken otyrysyna, sondaı-aq EQYU keńistigindegi ekstremızmge, radıkalızmge jáne ksenofobııaǵa qarsy is-qımyl jáne Ýkraınadaǵy qazirgi jaǵdaıǵa arnalǵan máseleler talqylanǵan pikirsaıystarǵa qatysty.
Saıası máseleler jáne qaýipsizdik komıtetiniń kún tártibindegi «Qarýly kúshterge jáne qaýipsizdik kúshterine parlamenttik baqylaý» negizgi máseleni talqylaý aıasynda Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy I.Adyrbekov Qazaqstan Prezıdenti N.Á.Nazarbaevtyń memlekettiń qaýipsizdik jáne syrtqy saıasat salasyndaǵy uzaq merzimdi damýyn belgilegen «Qazaqstan-2050» Strategııasynyń mańyzyn atap ótti.
«Strategııada, sondaı-aq Qazaqstan syrtqy saıasatynyń jańa tujyrymdamasynda halyqaralyq jáne aımaqtyq qaýipsizdikti nyǵaıtý, quqyq qorǵaý júıelerin reformalaý jáne qorǵanys qabiletin odan ári arttyrý basymdyqtar retinde belgilendi», - dep atap ótti senator. Bul turǵyda, depýtat I.Adyrbekovtiń pikirinshe, Qazaqstan Qarýly Kúshteri ofıtserleriniń BUU mıssııalarynyń quramyna jiberý týraly Memleket basshysy sheshiminiń erekshe máni bar. Ony ótken jylǵy jeltoqsanda el Parlamenti biraýyzdan qoldaǵan bolatyn. «Bul Helsınkı Qorytyndy aktisiniń rýhynda bizdiń elimizdiń aımaqtyq qaýipsizdikti nyǵaıtýdy qamtamasyz etýge qosqan kezekti úlesi bolady» - dedi ol.
Ekonomıkalyq máseleler, ǵylym, tehnologııa jáne qorshaǵan orta komıtetiniń otyrysynda sóz alǵan depýtat S.Nógerbekov Ortalyq Azııadaǵy sý resýrstary máselelerinde ózara tıimdi is-qımyl tetikterin ázirleý úshin EQYU áleýetin paıdalanýdyń mańyzdy ekenin atap ótti. Aımaqtaǵy mańyzdy sý-ekologııalyq máselelerdi teńgerimdilik jáne syndarly túrde sheshý jónindegi yntymaqtastyqtyń erekshe tetigi retinde ol Araldy qutqarý halyqaralyq qorynyń qyzmetin atap ótti.
«Astana ekonomıkalyq forýmy kúnderinde Qazaqstan Respýblıkasynyń Prezıdenti N.A.Nazarbaevtyń bastamasy boıynsha Dúnıejúzilik Daǵdarysqa qarsy konferentsııa ekinshi jyl ótýde. Birikken Ulttar Uıymy Bas Assambleıasynyń qoldaýymen jetekshi elderdiń, halyqaralyq uıymdardyń, ǵylymı-zertteý ınstıtýttarynyń jáne azamattyq qoǵamdardyń ókilderi ekonomıkalyq qaýipsizdikti jáne turaqty damýdy qamtamasyz etýdiń joldaryn talqylaýda», - dep atap ótti S.Nógerbekov. Ol EQYU parlamentshilerin «G-global» kommýnıkatıvtik alańynda Álemdik Daǵdarysqa qarsy jospar jobasyn talqylaýǵa, sondaı-aq bıylǵy mamyr aıynda ótetin 7-shi Astana ekonomıkalyq forýmyna jáne Daǵdarysqa qarsy ekinshi konferentsııaǵa qatysýǵa shaqyrdy.
Qazaqstandyq depýtattar EQYU-ǵa qatysýshy elderdiń parlamenttik delegatsııalar múshelerimen jáne Assambleıa basshylyǵymen kezdesýler ótkizip, EQYU Parlamenttik Assambleıa aıasynda ulttyq delegatsııalardyń ózara is-qımylyndaǵy ózekti máselelerdi talqylady.
Parlamentshilerdiń aımaqtyq iri birlestiginiń biri bolyp tabylatyn EQYU PA Qysqy sessııasynyń jumysyna 50-den astam elden kelgen 270 depýtat qatysty