Qazaqstandyq densaýlyq saqtaý salasy álemdik arenadan óz ornyn tapty
Mundaı sheshimdi Densaýlyq saqtaýǵa arnalǵan halyqaralyq qaýymdastyqtyń (ISQua) atqarýshy komıteti qabyldap otyr. Bul týraly Akkredıtteý ortalyǵyna silteme jasaı otyryp, Respýblıkalyq densaýlyq saqtaýdy damytý ortalyǵy habarlaıdy.
Ortalyqtyń málimetinshe, QR Densaýlyq saqtaý mınıstrliginiń Medıtsınalyq jáne farmatsevtıkalyq qyzmetti baqylaý komıteti men Akkredıtteý ortalyǵy birigip medıtsınalyq mekemelerdi akkredıtteýdiń ulttyq standarttaryn qalyptastyrý úshin birqatar sharalar (jańartý, testileý, múddeli memlekettik mekemelermen jáne uıymdarmen birge talqylaý, kelistirý jáne t.b.) atqardy. Bul sharalar Dúnıejúzilik densaýlyq saqtaý uıymy men Densaýlyq saqtaýdyń sapasy boıynsha halyqaralyq qaýymdastyqtyń talaptary eskerile otyryp jasaldy.
Halyqaralyq tájirıbede Densaýlyq saqtaýdyń sapasy boıynsha halyqaralyq qaýymdastyqtyń baǵasyn alyp, moıyndalǵan medıtsınalyq mekemelerdiń akkredıtteý standarttary asa úlken senimmen qoldanylady. Sondyqtan da jańartylǵan akkredıtteý standarttaryn dál osy halyqaralyq uıymǵa jiberý qajet dep sheshilipti. Bıylǵy qyrkúıekte ISQua qazaqstandyq standarttardy baǵalaý jumystaryn aıaqtady. Osylaısha, álemdik arenadaǵy otandyq densaýlyq saqtaý salasynyń bedeli bir satyǵa kóterilip, úlken senimge ıe boldy.