Qazaqstandyq delegatsııa Sındzo Abeni memlekettik jerleý rásimine qatysty

TOKIO. QazAqparat – QR Premer-Mınıstriniń orynbasary – Syrtqy ister mınıstri Muhtar Tileýberdi Japonııanyń burynǵy Premer-mınıstri Sındzo Abeni memlekettik jerleý rásimine qatysty. Bul týraly QR Syrtqy ister mınıstrliginiń baspasóz qyzmeti málim etti, dep habarlaıdy QazAqparat.

Resmı rásimge 6 myńnan astam adam, onyń ishinde Japonııanyń joǵary laýazymdy saıasatkerleri, Parlament depýtattary jáne 200-den astam el men halyqaralyq uıymdardyń sheteldik delegatsııalary qatysty. Bul – ІІ dúnıejúzilik soǵystan keıin el tarıhyndaǵy burynǵy premer-mınıstrdi ekinshi memlekettik jerleý rásimi boldy. 1967 jyly Japonııa eli Eshıda Sıgerýmen qoshtasqan bolatyn. S. Abe Japonııanyń Premer-Mınıstri laýazymynda eń uzaq qyzmet etken kórnekti saıasatker retinde óz halqynyń esinde qaldy.

Іs-shara sońynda Qazaqstan delegatsııasynyń basshysyn Japonııa Premer-Mınıstri Fýmıo Kıshıda qabyldady. Muhtar Tileýberdi Prezıdent Qasym-Jomart Toqaevtyń, Úkimettiń jáne Qazaqstan halqynyń atynan kóńil aıtty.

Mınıstr Japonııanyń asa kórnekti kóshbasshylarynyń biri bolǵan S. Abenyń Qazaqstan-Japonııa qarym-qatynastaryn damytýǵa qosqan erekshe úlesin atap ótti.

S. Abe 2015 jyly Qazaqstanǵa resmı saparmen keldi jáne ekijaqty yntymaqtastyqty keńeıtilgen strategııalyq áriptestik deńgeıine shyǵarýdyń bastamashysy boldy.

Fýmıo Kıshıda Qazaqstan halqyna qoldaǵany úshin alǵysyn bildirip, Memleket basshysyna izgi tilekterin joldady.

Buǵan deıin Memleket basshysynyń tapsyrmasymen QR Premer-Mınıstriniń orynbasary - Syrtqy ister mınıstri Muhtar Tileýberdi Japonııanyń burynǵy Premer-mınıstri Sındzo Abeni memlekettik jerleý rásimine qatysý úshin Tokıoǵa barǵany habarlanǵan edi.

Eske salsaq, Japonııanyń burynǵy Premer-mınıstri Sındzo Abeni belgisiz bireý atyp ketken bolatyn. Arada birneshe saǵat ótkende eks-premer aýrýhanada kóz jumdy.

Prezıdent Qasym-Jomart Toqaev Japonııanyń burynǵy Premer-mınıstri Sındzo Abeniń qastandyq áreket saldarynan qaza bolǵany týraly sýyt habardy tereń kúızelispen qabyldap, Japonııa Premer-mınıstri Fýmıo Kıshıdaǵa kóńil aıtý jedelhatyn joldady.

Sondaı-aq, QR Premer-Mınıstri Álıhan Smaıylov Japonııa elshiligine baryp, kórnekti saıası qaıratker, burynǵy Premer-Mınıstr Sındzo Abeniń qaza bolýyna baılanysty osy eldiń halqyna kóńil aıtty.

Foto: gov.kz