Qazaqstandyq delegatsııa Mekkedegi IYU 14-shi sammıtine qatysty

MEKKE. QazAqparat - 1 maýsym kúni Qazaqstan Respýblıkasy Prezıdentiniń Arnaıy ókili - Syrtqy ister mınıstri Beıbit Atamqulov bastaǵan qazaqstandyq delegatsııa Islam Yntymaqtastyǵy Uıymynyń (IYU) «Bolashaqqa birge» taqyrybyndaǵy mereıtoılyq sammıti 14-shi sessııasynyń jumysyna qatysty. Bul týraly QR Syrtqy ister mınıstrliginiń baspasóz qyzmeti habarlady.

Bul Sammıt Túrkııanyń IYU-ǵa úsh jyldyq tóraǵalyq etýiniń aıaqtalýyn jáne osy mıssııanyń Saýd Arabııasyna kóshýin atap ótti.

Memleket, úkimet jáne SІM basshylary, IYU múshe-memleketterdiń resmı tulǵalary ıslam Ýmmasynyń ózekti máselelerin, aımaqtyq qaqtyǵystar men syn-qaterlerdi, sondaı-aq ekonomıkalyq, áleýmettik jáne mádenı damý máselelerin talqylaý úshin barlyq musylmandar úshin qasıetti qalada jınaldy.

Saýd Arabııasynyń koroli Salman ben Abdelazız Al Saýd barlyq kelgen qonaqtardy jeke ózi qarsy alyp, IYU-nyń damýy men nyǵaıýyna qosqan úlesi úshin alǵysyn bildirdi.

Sammıttiń kún tártibi Palestınadaǵy (bólek qarar qabyldandy), Sırııa, Irak, Iemen, Aýǵanstandaǵy jáne IYU jaýapkershilik aımaǵyndaǵy basqa da turaqsyzdyq oshaqtaryndaǵy jaǵdaıǵa arnaldy. IYU-nyń nazarynda halyqaralyq terrorızm, ıslamofobııaǵa qarsy kúres, dinaralyq kelisimdi ilgeriletý jáne t.b. máseleler bar.

Sonymen qatar, is-sharaǵa qatysýshylar ınvestıtsııa tartý jáne túrli ekonomıkalyq jáne áleýmettik jobalardy qarjylandyrý, azyq-túlik qaýipsizdigi, ǵylym men tehnologııalar, klımattyń ózgerýi jáne turaqty damý, konfessııaaralyq ózara is-qımyl, áıelderdiń quqyqtary men múmkindikterin keńeıtý, Islam memleketteriniń gýmanıtarlyq saladaǵy birlesken is-áreketteri, adam quqyqtary máselelerin talqylady.
Joǵaryda kórsetilgen barlyq máseleler Sammıttiń Qorytyndy kommıýnıkesinde kórinis tapty.

Qorytyndy kommıýnıkeniń bólek tarmaǵy Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń eńbekterine arnaldy. Sammıt Elbasynyń ıslamdyq tatýlasý jónindegi bastamalar, Azyq-túlik qaýipsizdigi jónindegi Islam uıymy (AQIU), Islam Infraqurylymdyq Integratsııasy jáne IYU-15 dıalogtyq platformasy arqyly ıslam álemin ıntegratsııalaýdaǵy sińirgen eńbegin biraýyzdan moıyndady.

Sammıtke qatysýshylar Qazaqstanda bolǵan eleýli saıası ózgerister týraly jáne IYU baqylaýshy retinde qatysatyn aldaǵy prezıdenttik saılaýǵa daıyndyq jóninen habardar boldy.

Otyrys qorytyndysy boıynsha 2022 jyly Gambııada jáne 2025 jyly Indonezııada IYU kezekti sammıtterin ótkizý týraly sheshim qabyldandy.

Anyqtama: Islam Yntymaqtastyǵy Uıymy - BUU-dan keıingi aýqymy boıynsha ekinshi halyqaralyq uıym, onyń quramynda 57 el bar. 2011 jyldyń maýsymyna deıin Islam Konferentsııasy uıymy (IKU) dep ataldy. 2011 jylǵy 28 maýsymda Astanada Qazaqstan tarapynyń bastamasy boıynsha Syrtqy ister mınıstrleri keńesiniń 38-shi sessııasynda Islam Yntymaqtastyǵy Uıymy bolyp ózgertildi. Bıyl IYU 50 jyldyǵyn atap ótedi.

Ony qurý týraly sheshim 1969 jyly qyrkúıekte Rabatta (Marokko) musylman elderi kóshbasshylarynyń kezdesýinde qabyldandy. Sol kezde 24 memleket basshylary ekonomıkalyq, mádenı jáne rýhanı salalarda tyǵyz yntymaqtastyqty qamtamasyz etý úshin konsýltatsııalar ótkizýge ýaǵdalasty. IYU kezdesýleri ár úsh jyl saıyn shaqyrylady. Musylman qaýymdastyǵynyń sońǵy sammıti 2016 jyldyń sáýir aıynda Stambýlda ótti.