Qazaqstandyq chempıon ózbek boksshysyn jeńgennen soń álemdik reıtıngi joǵarylady

NUR-SULTAN. QazAqparat - Qazaqstandyq boksshy Bekzad Nurdáýletov (3-0, 1 KO) Aqtaýda ótken boks keshinde jeńiske jetkennen keıin Boxrec.com saıtynyń reıtınginde óz ornyn jaqsartty. Bul týraly QazAqparat Sports.kz saıtyna silteme jasap habarlaıdy.

Nurdáýletov segiz raýndtyń qorytyndysy boıynsha tóreshilerdiń biraýyzdan qabyldaǵan sheshimimen ózbekstandyq Farrýh Djýraevty (6-5-1, 2 KO) jeńip, BoxRec reıtınginde jartylaı aýyr salmaqta 12 pozıtsııaǵa: 134-ten 122-shi orynǵa kóterildi.

Eske salaıyq, Bekzad Nurdáýletov ótken jyldyń qazan aıynan beri kásibı boksta óner kórsetip keledi. Ol sondaı-aq tanzanııalyq Ibragım Maokolý (14-11-1, 9 KO) men nıgerııalyq Kabırý Tovolavıdi (15-4, 12 KO) súrindirdi. Nurdáýletovtyń áýesqoı bokstaǵy eń úzdik jetistigine keletin bolsaq, ol 2019 jyly Ekaterınbýrgte ótken álem chempıonatynda altyn enshilegen edi.