Qazaqstandyq boksshylardyń IBF-tegi reıtıngi qandaı

ASTANA. QazAqparat - Halyqaralyq boks federatsııasy (IBF) reıtınginiń jańartylǵan nusqasy  jarııalandy. Reıtıngtegi keıbir ózgerister qazaqstandyq sportshylarǵa da qatysty boldy. Bul týraly VKontakte áleýmettik jelisindegi «Qazaqstannyń kásibı boksy» paraqshasynda jazyldy, dep habarlaıdy QazAqparat.

Atap aıtqanda, birinshi orta salmaqtaǵy Qanat Islam bir pozıtsııaǵa tómendep, segizinshi orynǵa ornalasty. Óz kezeginde, jartylaı orta salmaqtaǵy Janqosh Turarov óz dıvızıonynda toǵyzynshy orynnan segizinshige kóterildi. Al sporttyq mansabyn aıaqtaǵan asa jeńil salmaqtaǵy Janat Jaqııanov 13-inshi orynǵa jaıǵasty.

Eske salaıyq, ótken aıda IBF qazaqstandyq boksshy Gennadıı Golovkındi (38-0-1, 34 KO) álem chempıony ataǵynan aıyrǵan bolatyn.

Sprıngfıldte (AQSh, Nıý-Djersı shtaty) ótken tyńdalymǵa Golovkın jáne IBF bekitken onyń mindetti qarsylasy ýkraınalyq Sergeı Derevıanchenko (12-0, 10 KO) sonymen qatar eki sportshynyń komandasy qatysty.

IBF komıssııasy eki tarapty da tyńdap shyǵyp, Gennadııdi IBF beldiginen aıyrý jóninde sheshim qabyldady. Óıtkeni ol 3 tamyzǵa sheıin Derevıanchenkomen aıqasýdan bas tartqan bolatyn.