Qazaqstandyq boksshylar Olımpıadaǵa qatyspaı qalýy múmkin

NUR-SULTAN. QazAqparat – Halyqaralyq Olımpıada komıteti boksshylardy 2024 jylǵy Parıjdegi Olımpıada oıyndaryna irikteýdiń jańa tártibin maquldady jáne bokstyń 2028 jyly Los-Andjeleste ótetin Olımpıada oıyndarynyń aldyn ala baǵdarlamasynan alynyp tastalǵanyn rastady. HOK Halyqaralyq boks federatsııasyndaǵy (IBA) jaǵdaıǵa alańdaýshylyq bildirip, federatsııany reformalaý protsesin baqylaýdy jalǵastyrady, dep habarlaıdy QazAqparat Sports.kz-ke silteme jasap.

Buǵan deıin, sáýir aıynda HOK IBA ázirlegen Parıjdegi oıyndarǵa irikteý baǵdarlamasyn bekitken bolatyn, alaıda maýsym aıynda federatsııany Olımpıada oıyndaryna irikteý sharalarynan taǵy da shettetti.

Allboxing.ru saıtynyń habarlaýynsha, jańa ereje boıynsha Parıj Olımpıadasyna irikteý 2023 jyly ótetin bes aımaqtyq halyqaralyq týrnırdiń qorytyndysy boıynsha júrgiziledi. Bul Santıagodaǵy Panamerıkalyq oıyndar, Krakovtaǵy Eýropa oıyndary, Solomon aralyndaǵy Tynyq muhıty oıyndary jáne Gýanchjoýdaǵy Azııa oıyndary. Afrıka elderi men HOK qaýymdastyǵy arasynda Akkradaǵy Afrıka oıyndaryn da irikteý týrnıri retinde esepteý týraly kelissózder jalǵasýda.

2024 jyly HOK qalǵan Olımpıada lıtsenzııalary taratylatyn eki dúnıejúzilik irikteý týrnırin ótkizýdi josparlap otyr.

HOK sport dırektory Kıt Makdonnell ulttyq federatsııalar, boksshylar, jattyqtyrýshylar men tehnıkalyq mamandardyń burynǵy irikteý úlgisine qatysty suraqtary bar ekenin, sonymen qatar jańa model jeńilirek ári sportshylardyń múddesin qorǵaıtynyn atap ótti.

Sondaı-aq IBA prezıdenti Ýmar Kremlevke joldaǵan hatynda HOK federatsııany reformalaýǵa qatysty kúsh-jiger jetkiliksiz deńgeıde jumsalyp jatqanyna alańdaýshylyq bildirip, bokstyń 2028 jylǵy Olımpıada baǵdarlamasyna áli engizilmegeni basa aıtylǵan.

25 qyrkúıekte Erevanda IBA-nyń kezekten tys kongresi ótedi, onda federatsııa prezıdenti qaıta saılanady.

Foto: sports.kz