Qazaqstandyq boksshy Qytaıdan kelgen qazaqtan basym tústi

ASTANA. QazAqparat - Almatyda ótken boks keshi aıasynda qazaqstandyq Temirlan Raıymqulov Qytaıdaǵy qandasymyz Birlik Jaıdaıyrmen jekpe-jekke shyǵyp, jeńiske jetti, dep habarlaıdy SPORT.INFORM .

Aıqastyń alǵashqy jartysy qarsylastardyń birin-biri barlaýymen ótti. Úshinshi raýndta Birlik ókpe tusynan aýyr soqqy ótkizip alyp, nokdaýnǵa túsip qalǵanymen, esin jıyp aldy. Nokdaýnnan keıin Raıymqulov qarsylasyn qyryna alyp, merziminen buryn kezdesýdi aıaqtaýǵa baryn salǵan edi. Alaıda Birlik gong soǵylǵansha shydap baqty. Tórtinshi ári sońǵy raýndta Raıymqulovtyń basymdyǵy anyq kórindi.

«Men úzdik jattyǵýdyń arqasynda jeńiske jettim. Osylaısha, úlken arenadaǵy shaıqastarǵa shyǵyp, Sonders pen Alvarestiń deńgeıindegi boksshylarmen shyqqym keledi. Meniń esimimdi esterińizge saqtap alyńyzdar! Meniń atym - Qara batyr. Qarsylasym da myqty edi, alaıda búgin men jeńis tuǵyrynan kórindim. Qazaqtyń boks mektebiniń álemde teńdesi joq», - deıdi Raıymqulov aıqastan keıin.

Aıta keterligi, bul Temirlan Raıymqulovtyń úshinshi aıqasy. Onyń ekeýinde Temirlan jeńiske jetip, taǵy bireýinde qarsylasymen teń túsken. Al qandasymyz Birlik te úshinshi ret sharshy alańǵa shyǵyp, eki boksshydan basym túsken.