Qazaqstandyq boksshy Golovkın-Derevıanchenko boks keshinde aıqasady

NUR-SULTAN. QazAqparat – Qazaqstandyq boksshy Álı Ahmedov (15-0, 11KO) Gennadıı Golovkın (39-1-1, 35KO) - Sergeı Derevıanchenko (13-1, 10KO) boks keshiniń anderkartynda óner kórsetetinin resmı málimdedi. Bul týraly VKontakte áleýmettik jelisinde «Qazaqstannyń kásipqoı boksy» paraqshasynda jazyldy, dep habarlaıdy QazAqparat.

«Madison Square Garden-niń ataqty rıngine oralýǵa jáne Gennadıı Golovkınniń boks keshine qatysatynyma qýanyshtymyn! #GGGPromotions 5 qazan kúni Nıý-Iorkte kezdesemiz!», - dep jazdy Á.Ahmetov Instagram-da.

Eske salaıyq, Ahmedov G.Golovkın qurǵan GGG Promotions kompanııasynyń boksshysy. Ol buǵan deıingi jekpe-jegin de Madison Square Garden-de Gennadııdiń boks keshiniń aıasynda ótkizgen bolatyn. Ahmedov amerıkalyq Markýs MakDenıeldi nokaýtqa túsirip, ekinshi orta salmaqtaǵy WBC International Silver tıtýlyn ıelendi.

Golovkın men ýkraınalyq Derevıanchenkonyń kezdesýi 5 qazan kúni Nıý-Iorktiń Madison Square Garden arenasynda ótedi. Olar IBF nusqasy boıynsha orta salmaqta bos turǵan álem chempıony tıtýlyna talasady. Jekpe-jek DAZN platformasynan taratylady. Aıta keteıik, Golovkın naýryz aıynda DAZN-men alty aıqasty qamtıtyn kelisimshart jasasqan edi. Qazaqstandyq boksshy olardy úsh jyldyń kóleminde ótkizýi tıis. GGG-diń seriktestik úshin gonorary 100 mln dollardan astam somaǵa baǵalanady.