Qazaqstandyq boksshy Anglııada jaısyz jaǵdaıǵa ushyrady

NUR-SULTAN. QazAqparat – Qazaqstandyq jeńil salmaq dárejesindegi boksshy Vıktor Kotochıgov (12-2, 5 KO) Anglııada ótken jattyǵý jıyny kezinde jaısyz oqıǵaǵa urynǵany týraly baıandap berdi, dep habarlaıdy QazAqparat Sports.kz saıtyna silteme jasap.

«Anglııadaǵy jıyn men úshin azdap sátsiz ótti. Men Anglııaǵa 11 jeltoqsanda josparlanǵan jekpe-jekke qatysý úshin úshyp keldim. Bólme jaldap, jattyǵýǵa kiristim. Tórt kún ótti. Túnde uıyqtap jatqanda esiktiń ar jaǵynan dybys shyqty, áldebireý qulypty ashpaqqa árekettenip jatyr. Tez turyp, qorǵanýym úshin pyshaq izdesem, as ishetin bólmede qasyq pen shańyshqydan basqa eshteńe joq. Esik ashylyp, ishke bastaryna kapıýshon kıip alǵan adamdar kirip keldi. Olarmen qarsylaspaq bolǵanymda, ústime qyshqylǵa uqsas áldeneni quıyp jiberdi. Qatty aýyrsyndym, al olar izderin sýytty. Birinshi kezekte jattyqtyrýshyǵa telefon soqtym. Ol meni aýrýhanaǵa apardy.

Denemdi kúıik shalyp, birneshe kúndi aýrýhanada ótkizdim. Men eshkimmen janjaldasqan joqpyn – bul kimge tıimdi bolǵanyn bilmeımin. Túıgenim – jattyǵý jıynyna tek tekserilgen jerlerge barý kerek», - dep jazdy Kotochıgov Instagram-daǵy paraqshasynda.

Eske sala ketsek, Kotochıgov sońǵy jekpe-jegin 12 naýryz kúni ótkizgen edi. Onda jeńil salmaqta WBO European tıtýly úshin aıqasta brıtandyq sportshy Gerı Kallıden (13-0, 7 KO) jeńilgen bolatyn.