Qazaqstandyq bitimgerlerdiń ekinshi toby Lıvanǵa attandy
QR Qorǵanys mınıstrliginiń aqparatyna sáıkes, j ospar boıynsha rotatsııalyq tártippen 60 bitimgerden turatyn top «Lıvandaǵy BUU ýaqytsha kúshteri» mıssııasynyń quramynda qyzmet ótkerý úshin jiberildi. Bul rotatsııanyń ereksheligi – bitimgershilik mıssııasynyń tarıhynda alǵash ret quramǵa Desanttyq-shabýyldaýshy áskerleriniń ǵana emes, sondaı-aq óńirlik qolbasshylyqtardyń da áskerı qyzmetshileri engizildi.
Jalpy alǵanda, tórtinshi qazaqstandyq bitimgershilik rotasynyń quramyna 120 áskerı qyzmetshi kiredi. Epıdemıologııalyq jaǵdaıdy eskere otyryp, jeke quramnyń densaýlyǵyn saqtaý úshin áskerı qyzmetshilerdi jiberý eki kezeńge josparlanyp, tamyz aıynyń basynda jáne ortasynda ótkizý týraly sheshim qabyldandy.
Lıvanǵa kelgennen keıin qazaqstandyq áskerı qyzmetshiler 2019 jylǵy qarashadan bastap mıssııadaǵy úshinshi bitimgershilik rotasyndaǵy áriptesterin almastyrady. Bitimgerler jergilikti jerdi patrýldeý jónindegi mindetterdi oryndap, azamattyq halyqqa kómek kórsetip, baqylaý beketterin uıymdastyryp, mıssııa shtabynyń basqa da is-sharalaryna qatysatyn bolady. Kún saıyn qazaqstandyq jáne úndi bitimgerleri birlesip 50-ge jýyq mindetterdi oryndaıdy.
Barlyq áskerı qyzmetshiler bitimgershilik qyzmetke qatysty Birikken Ulttar Uıymynyń negizgi qujattarynyń rásimderi men normalaryna sáıkes muqııat iriktelip, oqytyldy. Tapsyrmalardy oryndaý úshin jeke quramdy daıyndaý toǵyz aı boıy Almaty oblysynyń N. Tilendıev oqý ortalyǵy bazasynda karantındik sharalardy qatań saqtaı otyryp júrgizildi.
Esterińizge sala keteıik, Qazaqstannyń «Lıvandaǵy BUU ýaqytsha kúshteri» bitimgershilik mıssııasyna qatysýy 2018 jyldyń qazan aıynda BUU mandatyna sáıkes Lıvanda qazaqstandyq jáne úndi bitimgerlerin birlesip óristetý týraly memorandýmǵa qol qoıylǵannan keıin bastaldy.