Qazaqstandyq bitimgerler beıbitshilikti qoldaý operatsııasyn ótkizdi

NUR-SULTAN. QazAqparat - Reseı Federatsııasynda ótken «Myzǵymas baýyrlastyq-2021» birlesken oqý-jattyǵýy barysynda Ujymdyq qaýipsizdik týraly shart uıymynyń Ujymdyq bitimgershilik kúshteri beıbitshilikti qoldaý jónindegi mindetterdi pysyqtady, dep habarlaıdy QR QM baspasóz qyzmeti.

Jaýyngerlik daıarlyq departamentiniń bastyǵy – Qazaqstan Qarýly Kúshteri Bas shtaby bastyǵynyń orynbasary general-maıor Dáýlet Ospanov birlesken oqý-jattyǵý basshylyǵynyń quramynda qazaqstandyq bólimsheniń is-qımylyn úılestirdi.

Onyń aıtýynsha, oqý-jattyǵýdyń negizgi maqsaty beıbitshilikti qoldaý jónindegi birlesken operatsııany ótkizýde Ujymdyq qaýipsizdik týraly shart uıymy Ujymdyq bitimgershilik kúshteri bólimsheleriniń úılesimdi baılanysyn arttyrý boldy.

Qazaqstandyq bitimgerler gýmanıtarlyq júgi bar lekterdi alyp júrý, jergilikti jerdi patrýldeý boıynsha oqý-jaýyngerlik tapsyrmalardy oryndaýǵa qatysty, shartty daǵdarys aýdanyndaǵy qaqtyǵysty retteý úshin eldi mekendi buǵattady. Qorytyndy kezeńde tájirıbe is-qımylynyń keshendi oıyny ótkizildi.

Oqý-jattyǵýǵa barlyǵy 1 700-den astam áskerı qyzmetshi, 300-den asa áskerı tehnıka men áskerı avıatsııa tikushaqtary jumyldyryldy.