QAZAQSTANDYQ BATYRLAR: Sultan Baımaǵambetov

ASTANA. QazAqparat - Baımaǵambetov Sultan Birjanuly 1920 jyly Qostanaı oblysy Áýlıekól aýdany Qoıandyaǵash aýylyna dúnıege kelip, 1943 jyly shildeniń 25-i kúni Lenıngrad oblysy Kırov aýdany Sınıavıno eldi mekeninde qaza tapqan. Keńes Odaǵynyń Batyry.

1940 jyly ásker qataryna alynyp, 1941 jyldyń maýsym aıynan bastap Uly Otan soǵysyna qatysty. Aldymen mergender rotasynda, keıinnen pýlemetshiler bólimshesinde qyzmet etti. Lenıngrad (qazirgi Sankt-Peterbor) túbindegi urystarda 50-den astam dushpannyń kózin joıdy. 4 ret jaralanǵan. 1943 jylǵy shildedegi Lenıngradty Úlken jermen baılanystyryp turǵan tar ótkeldi keńeıtý úshin júrgizilgen urystarda Baımaǵambetov Lenıngrad maıdanynyń 67-armııasy 43-atqyshtar dıvızııasyna qarasty 147-atqyshtar polkinde pýlemet bólimshesiniń komandıri boldy. 1943 jyly 25 shilde kúni bolǵan shaıqasta jaý dzotyn keýdesimen jaýyp, erlikpen qaza tapty. KSRO Joǵary Keńesi Prezıdıýmynyń sheshimimen Baımaǵambetovke Keńes Odaǵynyń Batyry ataǵy berildi (21.2.1944).

Qostanaı qalasy men Áýlıekól kentindegi aýylda eki kóshege Baımaǵambetov esimi berildi. Qoıandyaǵash aýylynda eskertkish ornatylǵan.

Málimet kózi: Vıkıpedııa