QAZAQSTANDYQ BATYRLAR: Sabyr Rahımov

ASTANA. QazAqparat - Sabyr Omaruly Rahımov 1902 jyly Ońtústik Qazaqstan oblysy Qazyǵurt aýdany Kókbel aýylynda ómirge kelip, 26.3.1945 jyly naýryzdyń 26-ynda Polshanyń Dantsıg (qazirgi Gdansk qalasy) qalasynda qaza tapqan. Súıegi Tashkenttegi baýyrlastar zıratyna jerlengen. Áskerı qaıratker, general-maıor (1943), Keńes Odaǵynyń Batyry (1965). Ákesi erte qaıtys bolyp, jas qalǵan Rahımovty sheshesi (ózbek qyzy) Ózbekstanǵa alyp ketken.

1922 jyly ásker qataryna shaqyrylǵan. Bakýdegi áskerı ýchılışeni bitirisimen (1925), Samarqand qalasyndaǵy atty áskerler dıvızııasynda vzvod, eskadron komandıri boldy. 1925-27 jyldary Orta Azııada (Qaraqumda) Keńes ókimetine qarsy shyqqandarmen qarsy kúrestegi erligi úshin Qyzyl Tý ordenimen marapattalǵan (1927). 1941 jylǵa deıin túrli áskerı mekemelerde qyzmet istedi. Soǵys bastalǵanda polk, keıin dıvızııa qolbasshysy boldy.

1941 jyly shildede jaý qorshaýyn buzyp shyqqan batyldyǵy úshin 2-ret Qyzyl Tý ordenimen marapattalyp, polkovnık shenin aldy. Onyń dıvızııasy Dondaǵy Rostovta, Kavkazda urys júrgizdi. 1943 jyly Máskeýdegi Bas shtab akademııasyna oqýǵa jiberildi. Akademııany bitirgen soń Belorýssııany, Polshany azat etýge qatysty. Soǵys jyldary ol basqarǵan dıvızııanyń jaýyngerlik týyna 2 Qyzyl Tý, Sývorov jáne Kýtýzov ordenderi taǵyldy. Rahımov Lenın, 4 ret Qyzyl Tý, Qyzyl Juldyz, 2-dárejeli Sývorov ordenderimen, medaldarmen marapattalǵan.

Ol jóninde "General Rahımov" atty kórkem fılm túsirildi. Ózbekstandaǵy aýyldar, mektepter, Tashkenttiń bir aýdany, kóshesi, metro beketi, Ońtústik Qazaqstan oblysy Qazyǵurt aýdany Kókbel aýylyndaǵy orta mektep Rahımov esimimen atalady. Tashkent qalasynda Rahımovqa eskertkish ornatylǵan. Polsha Respýblıkasynyń bir traýleri general Rahımov esimimen atalady. Qazirgi ýaqytta Ońtústik Qazaqstan oblysy Shymkent qalasynda Táýke han kóshesiniń boıynda Jeńis saıabaǵynda eskertkishi ornatylǵan. Málimet kózi: Vıkıpedııa