Qazaqstandyq baspa Máskeýde ótken halyqaralyq kitap jármeńkesinde tórt birdeı dıplomǵa ıe boldy
Máskeý halyqaralyq kitap jármeńkesi - dúnıejúzilik jetekshi baspalardyń nazaryn aýdaratyn, kitap baspagerleriniń aıtýly is-sharalarynyń biri.
«Folıant» JShS baspasynyń bas dırektory Nurlan Isabekov kitap jármeńkesi týraly pikirin bylaı jetkizdi: «Bul konkýrsqa júıeli túrde qatysyp turamyz. Marapattaýlar buryn da bolǵan, biraq birden tórt dıplom alýymyz birinshi ret. Biz kitap baspagerleriniń halyqaralyq qaýymdastyǵy qazaqstandyq avtorlardy dáripteýdegi eńbegimizdi osylaısha joǵary baǵalaǵanyna alǵys bildiremiz. Osy jetistikterimizge aıtarlyqtaı úles qosqan avtorlarymyzdyń da eńbegi orasan zor. Bizdiń avtorlar - óz elderiniń naǵyz otan súıgish azamattary. Bizdiń elde talantty avtorlar sany arta bersin. Olarmen aldaǵy ýaqyttarda da yntymaqtastyqta bolamyz degen oıdamyn».
Merzimdik basylym, kitap shyǵarý, kitap taratý jáne baspa isi salasyndaǵy yntymaqtastyq jónindegi memleketaralyq keńestiń sheshimine sáıkes, K.Seıtenovtiń «Sýdebno-pocherkovedcheskaıa ekspertıza rýkopıseı, vypolnennyh na kazahskom ıazyke» atty kitabyn basyp shyǵarǵany úshin «Ǵylym jáne ınnovatsııalar» nomınatsııasy boıynsha «Folıant» baspasyn ІІІ dárejeli dıplommen marapattady.
Sondaı-aq S.Igibaevtyń «Istorııa Kazahstana v ıstochnıkah ı materıalah» kitabyn daıyndap shyǵarǵany úshin baspa «Oqý ádebıeti jáne bilim berý» nomınatsııasy boıynsha ІІІ dárejeli dıplommen marapattaldy. J.Sahıevtiń «Astronomııa» entsıklopedııasyn daıyndap, alǵash ret qazaq tilinde basyp shyǵarǵany úshin «Folıant» baspasynyń ókilderine arnaıy dıplom tabystaldy.
«Odaqta basylyp shyqqan» nomınatsııasy boıynsha І dárejeli dıplom da S.Hodjıkovtyń «Qulahmet Hodjıkov - qazaq teatry jáne kınosynyń birinshi sýretshisi» atty úsh tildegi albom-kitabyn daıyndap shyqqan qazaqstandyq baspaǵa buıyrdy.
«Qazirgi tańda adamdar, ásirese jastar qaýymy kitap oqymaıdy degendi jıi estip júrmiz. Alaıda kitapty «aqyl-oıdyń qazynasy» dep bekerge aıtpasa kerek, sol sebepti de bizdiń ujym qoǵamnyń oqýǵa degen yntasyn arttyrý maqsatynda aıanbaı eńbek etip keledi. Biz kópshilik oqyrmannyń nazaryna ár túrli baǵyttaǵy kitaptar usynamyz.
«Kez kelgen tehnologııalyq tóńkeristerge qaramastan, kitap - adamzattyń ómirinde mańyzdy orynǵa ıe bolyp qala bermek, al marapattaýlar - osy saladaǵy álemdik brendterden asyp túspese, kem túspeıtin bizdiń ónimniń joǵary deńgeıin dáleldeı túsedi», - degen pikir aıtty Nurlan Isabekov.