Qazaqstandyq barlaýshylar Ulybrıtanııadaǵy saıysta júlde aldy

ASTANA. QazAqparat - Qorǵanys mınıstrligine qarasty «Batys» óńirlik qolbasshylyǵynyń barlaýshylar komandasy Ulybrıtanııada ótken «Cambrian Patrol 2018» jaıaý patrýlderdiń halyqaralyq dodasynda qola medaldi enshiledi. Bul týraly QR Qorǵanys mınıstrliginiń baspasóz qyzmeti habarlady.

Beldi saıysqa barlyǵy 37 elden 137 komanda qatysty. Onyń 90-y Ulybrıtanııa ókilderi. Baıqaýdyń ózi qazannyń 12-i men 21-i aralyǵynda Ýels taýynyń Chernyh aýdanynda Brekon qalashyǵynyń mańynda Sennıbrıdj polıgonynda ótti.

Bıylǵy jyly saıys jerdi barlaý, adamdar tobyna alǵashqy kómek kórsetý, sý bógetin eńserý, zaqymdalǵan jer ýchaskesindegi is-qımyldar, eldi mekendegi tekserý is-qımyldary, artıllerııanyń atysyn retteý, shabýyldaý is-qımyldaryn júrgizý sııaqty negizgi tapsyrmalardan uıymdastyryldy.

Qazaqstandyq barlaýshylar tobynyń komandıri kapıtan Rýslan Sháripovtiń aıtýynsha, marshrýttyń jalpy uzyndyǵy 60-tan asa shaqyrymdy qurady.

«Bizge qashyqtyqty 48 saǵat ishinde eńserýge týra keldi. Bul rette jol-jónekeı taktıkalyq tapsyrmalardy oryndadyq. Tapsyrma barǵan saıyn kúrdelene tústi. Onyń ústine únemi jańbyr jaýyp turdy. Alaıda, bul jaǵdaı bizdi qamshylaı tústi jáne bizdi jaqsy nátıjeler kórsetýge yqpal etti deýge bolady», - dedi Rýslan Sháripov.

Onyń sózinshe, saıys barysynda qatysýshylarǵa tek aǵylshyn tilinde sóılesýge ruqsat etildi, ózge tilderge aýdarý joq. Biraq, úshinshi nátıje kórsetken áskerı qyzmetshilerimiz úshin til máselesi kedergi bolǵan joq.

«Cambrian Patrol» halyqaralyq oqý-jattyǵýy Ýelsta jyl saıyn 40 jyl boıy ótkizilip keledi jáne arnaıy maqsattaǵy bólimshege irikteýmen salystyrýǵa bolatyn áskerı qyzmetshiler arasyndaǵy eń kúrdeli ári beldi saıystyń biri bolyp sanalady. Bul qashyqtyqty shamaly adamdar ǵana eńsere alady.